កម្ពុជានឹងបង្ហាញសក្តានុពលទេសចរណ៍ដ៏អស្ចារ្យ ទៅកាន់ ២៨ ប្រទេសសមាជិក CICA តាមរយៈការតភ្ជាប់កាន់តែស្អិតរមួត

ក្នុងឱកាសនៃជំនួបនេះ ភាគីទាំងពីរ បានផ្លាស់ប្តូរយោបល់លើស្ថានភាពទូទៅ និងទិសដៅអភិវឌ្ឍន៍នៃវិស័យទេសចរណ៍ ព្រមទាំងពិភាក្សាលើឱកាសសហប្រតិបត្តិការជាក់ស្តែងជាមួយបណ្តាប្រទេសសមាជិក CICA ក្នុងការជំរុញការតភ្ជាប់ទេសចរណ៍ក្នុងតំបន់។ ទន្ទឹមនឹងនេះ ភាគី CICA បានថ្លែងអំណរគុណចំពោះការទទួលស្វាគមន៍យ៉ាងកក់ក្តៅ និងបានបង្ហាញចំណាប់អារម្មណ៍ខ្ពស់លើសក្តានុពលទេសចរណ៍កម្ពុជា ជាពិសេសលើកត្តាសុខសន្តិភាព ស្ថេរភាពនយោបាយ ព្រមទាំងការអភិវឌ្ឍសេដ្ឋកិច្ច និងសង្គមដែលជាមូលដ្ឋានសំខាន់សម្រាប់ការទាក់ទាញភ្ញៀវទេសចរ និងវិនិយោគិនបរទេស។

ជាកិច្ចឆ្លើយតប ឯកឧត្តមរដ្ឋមន្ត្រី បានសម្តែងការកោតសរសើរ និងវាយតម្លៃខ្ពស់ចំពោះតួនាទីរបស់ CICA ក្នុងការជំរុញសន្តិភាព ស្ថិរភាព និងកិច្ចសហប្រតិបត្តិការលើកនៅតំបន់អាស៊ី ហើយបានថ្លែងអំណរគុណចំពោះការគាំទ្រនានា ក្នុងការផ្សព្វផ្សាយសក្តានុពលទេសចរណ៍កម្ពុជា។

ជាមួយគ្នានេះ ភាគីទាំងពីរ បានពិភាក្សាស៊ីជម្រៅលើគំនិតផ្តួចផ្តើមសហប្រតិបត្តិការជាច្រើន រួមមាន ការរៀបចំវេទិកាទេសចរណ៍ CICA ការអភិវឌ្ឍគម្រោងខ្សែក្រវ៉ាត់ទេសចរណ៍ ការរៀបចំកិច្ចប្រជុំជំនាញ ឬសិក្ខាសាលា ការផ្សព្វផ្សាយបេតិកភណ្ឌវប្បធម៌ និងគោលដៅទេសចរណ៍រួម ក៏ដូចជាកម្មវិធីទេសចរណ៍យុវជន និងការផ្លាស់ប្តូរអប់រំ ដើម្បីលើកកម្ពស់ការតភ្ជាប់ និងការយល់ដឹងរវាងប្រជាជននៃប្រទេសសមាជិក។

លើសពីនេះ ភាគីកម្ពុជា ក៏បានស្នើឱ្យ CICA ពិនិត្យលទ្ធភាពរៀបចំព្រឹត្តិការណ៍ផ្សព្វផ្សាយទេសចរណ៍ ការតាំងពិព័រណ៍ និងវេទិកាថ្នាក់តំបន់ ដើម្បីលើកកម្ពស់សក្តានុពលទេសចរណ៍ និងជំរុញការវិនិយោគ រួមទាំងការរៀបចំវេទិកាវិនិយោគទេសចរណ៍ CICA លើកដំបូង និងកម្មវិធី FAM Trip ដើម្បីទាក់ទាញវិនិយោគិន និងភ្ញៀវទេសចរមកកម្ពុជា ព្រមទាំង បានស្នើឱ្យមានការជំរុញការបណ្តុះបណ្តាលសមត្ថភាពមន្ត្រី និងអ្នកជំនាញក្នុងវិស័យទេសចរណ៍ ដើម្បីពង្រឹងចំណេះដឹងវិជ្ជាជីវៈ សមត្ថភាពស្ថាប័ន និងជំនាញបច្ចេកទេស ដែលនឹងរួមចំណែកលើកកម្ពស់គុណភាពសេវាកម្ម និងការគ្រប់គ្រងវិស័យទេសចរណ៍។

គួរបញ្ជាក់ផងដែរថា សន្និសីទអន្តរសកម្មភាព និងវិធានការកសាងទំនុកចិត្តនៅអាស៊ី (CICA) ត្រូវបានបង្កើតឡើងតាំងពីឆ្នាំ១៩៩៩ មានទីស្នាក់ការកណ្តាលនៅរដ្ឋធានី Astana ប្រទេសកាហ្សាក់ស្ថាន ហើយមានសមាជិកចំនួន ២៨ ប្រទេស គ្របដណ្តប់ប្រមាណ ៩០% នៃដែនដី និងប្រជាជនអាស៊ី។ ប្រទេសកម្ពុជា ក៏បានចូលជាសមាជិកនៅថ្ងៃទី១ ខែមីនា ឆ្នាំ២០១១ និងបានចូលរួមយ៉ាងសកម្មក្នុងការជំរុញសន្តិភាព ស្ថិរភាព និងការអភិវឌ្ឍនៅក្នុងតំបន់។

ប្រភព៖ ក្រសួងព័ត៌មាន