[វីដេអូ] សុខភាពស្រ្តី និងសម្ភព ប្រធានបទ៖ Ep.21 ការរំលូតកូន ដោយសុវត្ថិភាព

តើអ្វីទៅជាការរំលូតកូនដោយសុវត្ថិភាព?

តាមរយៈការបកស្រាយរបស់វេជ្ជបណ្ឌិត ប៉ុម សុថារី ឯកទេសសុខភាពបន្តពូជ និងវិបត្តិគ្មានបុត្រ បានធ្វើការចែករំលែកទៅលើការរំលូតកូនដោយសុវត្ថិភាព គឺជាការផ្ដោតទៅលើ២ចំណុចសំខាន់គឺ៖

-ការផ្ដល់ការប្រឹក្សា ឬសេវារំលូតត្រូវធ្វើឡើងនៅមូលដ្ឋានសុខាភិបាល ដូចជា មន្ទីរពេទ្យ មណ្ឌល សុខភាព ឬគ្លីនិកឯកជនដែលទទួលបានការអនុញ្ញាតពីក្រសួងសុខាភិបាល។

-ការផ្ដល់សេវារំលូតដោយគ្រូពេទ្យជំនាញដូចជា វេជ្ជបណ្ឌិត គ្រូពេទ្យមធ្យម ឆ្មបមធ្យមដែលបានទទួលការបណ្តុះបណ្តាលការថែទាំរំលូតដោយសុវត្ថិភាពនិងមានសញ្ញាបត្របញ្ជាក់ពីក្រសួងសុខាភិបាល។

តើការរំលូតកូនដោយសុវត្ថិភាពចែកចេញជាប៉ុន្មានទម្រង់?

នៅក្នុងការរំលូតកូនដោយសុវត្ថិភាពបានចែកចេញជា ២ប្រភេទ៖

- ទី១ ការរំលូតកូនដោយប្រើឳសថ

- ទី២ ការរំលូតកូនដោយប្រើឧបករណ៏បូមសំអាតដោយដៃ។

តើកត្តាអ្វីខ្លះដែលបណ្តាលអោយស្រ្តីជ្រើសរើសការរំលូតកូន?

កត្តាជាច្រើនដែលបណ្តាលអោយស្រ្តីសម្រេចចិត្តនៅក្នុងការជ្រើសរើសការរំលូតកូនមានដូចជា៖

-ការមិនទាន់បានត្រៀមខ្លួន (គូស្វាមីភរិយា​ )

-បញ្ហាសុខភាព

-បញ្ហាគត៌មិនប្រក្រតី

-បញ្ហាគ្រួសារ (ការរស់នៅមិនចុះសម្រុងគ្នា)

-ស្រ្តីដែលដែទទួលរងការំលោភផ្លូវភេទ

-បញ្ហាសេដ្ឋកិច្ចក្នុងគ្រួសារ -ល- ។

យោងទៅតាមច្បាប់របស់ព្រះរាជាណាចក្រកម្ពុជា ដែលបានអនុម័តនៅក្នុងឆ្នាំ១៩៩៧ មាត្រា៨ នៃច្បាប់ស្ដីពីការរំលូត៖
ការ​រំលូត​កូន​អាច​ធ្វើ​ទៅ​បាន​​ ចំពោះ​តែ​គភ៌​ណា​ដែល​មាន​អាយុ​តិច​​ជាង​ ១២​សប្ដាហ៍​។ លើស​ពី​ ១២សប្ដាហ៍​នៃ​អាយុ​គភ៌​ ការ​រំលូត​កូន​អាច​ទទួល​បាន​ការអនុញ្ញាត​ លុះ​តែ​ក្នុង​ពេល​ធ្វើ​រោគ​វិនិច្ឆ័យ​ឃើញ​ថា ៖

-គភ៌​មានសភាព​លូតលាស់​​មិន​ប្រក្រតី​ ឬ​បង្ក​គ្រោះថ្នាក់​​ដល់​ជីវិត​ម្ដាយ

-កូន​ដែល​នឹង​កើត​មក​អាច​​មានជំងឺ​ធ្ងន់ធ្ងរ​ព្យាបាល​ពុំ​ជា

-ក្នុង​ករណី​ដែល​ត្រូវ​គេ​រំលោភ​បណ្ដាល​ឱ្យ​មាន​គភ៌​

តើការរំលូតកូនមានកត្តាប្រឈមអ្វីខ្លះ?

 +កត្តាប្រឈមនៃការរំលូតកូន ដោយប្រើឳសថ ៖ កត្តាប្រឈមមានកម្រិតទាប

• ការរំលូតបរាជ័យៈ ការប្រើឳសថមិនបាន ១០០% មិនទៀងទាត់
• ការធ្លាក់ឈាមធ្ងន់ធ្ងរ
• ការក្លាយរោគ គឺជាការកររោគក្រោយរំលូត

 +កត្តាប្រឈមនៃការរំលូតដោយការបូមសំអាត

• ការធ្លាក់ឈាមធ្ងន់ធ្ងរអាចកើតមានក្នុងកំឡុងពេលបូមនិងក្រោយពេលសំអាត
• ការក្លាយរោគក្នុងកំឡុងពេលបូមនិងក្រោយពេលសំអាត
• របួសនៅមាត់ស្បូន ធ្លាយស្បូន
• ការរំលូតកូនមិនអស់

ជាចុងក្រោយ លោកស្រីវេជ្ជបណ្ឌិត ប៉ុម សុថារី សូមស្រ្តីគ្រប់រូបមុននឹងទទួលយកសេវារំលូតកូន សូមពិគ្រោះយោបល់ជា​មួយ​គ្រូពេទ្យជំនាញ និងពិនិត្យសុខភាពឲ្យច្បាស់ជាមុនសិន ចៀសវាងជួបប្រទះ​នៅកត្តាប្រឈមនានា ដែលអាចធ្វើស្រ្តីមានគ្រោះថ្នាក់ដល់សុខភាព ឬប៉ះពាល់ដល់អាយុជីវិតផងដែរ។ មិនត្រឹមតែប៉ុណ្ណោះ ចំពោះគូស្វាមីភរិយា ឬអ្នកដែលមានដៃគូដែលមិនទាន់ចង់បានបុត្រ សូមរៀបចំធ្វើផែនការគ្រួសារក៏ដូចជាជ្រើសរើសសេវាពន្យារកំណើតដែលសមស្របជាមួយនិងសុខភាពចៀសវាងការមានកូនចៃដន្យផងដែរ ៕

សូមទស្សនាវីដេអូខាងក្រោម៖