សម្តេចតេជោ ហ៊ុន សែន ប្រាប់រដ្ឋមន្ត្រីការបរទេសអាស៊ានថា អាស៊ានកំពុងធ្វើការស្វិតស្វាញដើម្បីបញ្ចប់ក្រមប្រតិបត្តិបញ្ហាសមុទ្រចិនខាងត្បូង

ក្នុងនាមជាប្រធានអាស៊ានឆ្នាំ២០២២នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់ទៅកាន់រដ្ឋមន្ត្រីការបទេសអាស៊ាន ដែលចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធថា អាស៊ាន បានកំពុងតែធ្វើការយ៉ាងស្វិតស្វាញដើម្បីបញ្ចប់ក្រមប្រតិបត្តិពីបញ្ហាសមុទ្រចិនខាងត្បូង។

សីហា 3, 2022 03:21 727

សម្តេចតេជោ ហ៊ុន សែន ប្រាប់រដ្ឋមន្ត្រីការបរទេសអាស៊ានថា អាស៊ានកំពុងធ្វើការស្វិតស្វាញដើម្បីបញ្ចប់ក្រមប្រតិបត្តិបញ្ហាសមុទ្រចិនខាងត្បូង

ថ្លែងក្នុងពិធីបើកកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធ នាព្រឹកថ្ងៃទី០៣ ខែសីហា ឆ្នាំ២០២២ នៅសណ្ឋាគាសុខាភ្នំពេញ សម្តេចតេជោ ហ៊ុន សែន បានលើកឡើងថា នៅក្នុងឆ្នាំនេះ យើងក៏សម្រេចបាននូវសមិទ្ធផលជាច្រើនផងដែរ។ ជុំវិញ បញ្ហាវិបត្តិ សុខភាព, យើងក៏អាចងើបចេញពីជំងឺកូវីដ-១៩ បានយ៉ាងល្អប្រសើរ។ បើនិយាយ អំពីពាណិជ្ជកម្ម និងការវិនិយោគ, យើងបានដាក់ចូលជាធរមាននូវកិច្ចព្រមព្រៀងភាពជាដៃគូ សេដ្ឋកិច្ចគ្រប់ជ្រុងជ្រោយតំបន់ (ឬហៅកាត់ថា អាសិប-RCEP)។

សម្តេចតេជោបន្តថា ព្រឹត្តិការណ៍សំខាន់មួយទៀត គឺខួបទី២០ឆ្នាំ នៃសេចក្ដីថ្លែង ការណ៍ ស្តីពីការប្រតិបត្តិរបស់បណ្តាភាគីនៅសមុទ្រចិនខាងត្បូង(DOC) ដែលជាឯកសារ ដ៏សំខាន់ ក្នុងការគ្រប់គ្រង ទំនាក់ទំនងរវាងគ្រប់ភាគី ពាក់ព័ន្ធទាំងអស់នៅ សមុទ្រចិន ខាងត្បូង។

សម្តេចតេជោបានថ្លែងបញ្ជាក់ថា “យើងក៏ បាន និងកំពុងធ្វើការយ៉ាងស្វិតស្វាញ ផងដែរ ដើម្បីបញ្ចប់ក្រមប្រតិបត្តិនៅសមុទ្រចិនខាងត្បូង(COC) ដែលប្រកបដោយអត្ថន័យ និងប្រសិទ្ធភាព ដោយអនុលោមតាមច្បាប់អន្តរជាតិ ដូចជា អនុសញ្ញាសហប្រជាជាតិស្ដីពី ច្បាប់សមុទ្រ (UNCLOS) ផងដែរ”។

ជាមួយគ្នានោះដែរ សម្តេចតេជោក៏បានបន្ថែមថា ចំពោះដំណើរការនៃការចូលជា សមាជិកអាស៊ានរបស់ទីម័រឡេស្តេ កំពុងមានវឌ្ឍនភាពយ៉ាងល្អ ហើយសម្ដេចមាន សុទិដ្ឋិនិយមថា យើងនឹងអាចស្វាគមន៍ប្រទេសនេះមកកាន់គ្រួសារអាស៊ាន បានយ៉ាងយូរនៅ ត្រឹមឆ្នាំក្រោយ៕