ការ៉ាតេកម្ពុជាឈ្នះមេដាយជើងឯកនៅថៃ ជាក្តីសង្ឃឹមកាន់តែខ្ពស់ឆ្ពោះទៅគោលដៅធ្វើម្ចាស់ផ្ទះ ស៊ី ហ្គេម ២០២៣

កីឡាករ កីឡាការិនីការ៉ាតេកម្ពុជា ដណ្តើមបានមេដាយសរុប៧ គ្រឿងពីការប្រកួតកីឡាការ៉ាតេជើងឯក (Thailand Open Karate-DO Championship 2022) ឆ្នាំ២០២២ កាលពីពេលថ្មីៗនេះ ដែលនេះគឺជាក្តីសង្ឃឹមកាន់តែខ្ពស់ ក្នុងដំណើរឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡា ស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជា។

កញ្ញា 5, 2022 03:19 745

ការ៉ាតេកម្ពុជាឈ្នះមេដាយជើងឯកនៅថៃ ជាក្តីសង្ឃឹមកាន់តែខ្ពស់ឆ្ពោះទៅគោលដៅធ្វើម្ចាស់ផ្ទះ ស៊ី ហ្គេម ២០២៣

លោក ដែក ភារៈ អគ្គលេខាធិការរង សហព័ន្ធកីឡាការ៉ាតេកម្ពុជាបានគូសបញ្ជាក់ថា មេដាយចំនួន ៧គ្រឿង ដែលកីឡាការ៉ាតេកម្ពុជាដណ្តើមបាន ក្នុងព្រឹត្តិការណ៍អន្តរជាតិនៅប្រទេសថៃនេះ រួមមាន៖ មេដាយប្រាក់ ៣គ្រឿង និងមេដាយសំរឹទ្ធិ ៤គ្រឿង។ មេដាយប្រាក់លើវិញ្ញាសាឯកត្តជនដណ្តើមបានដោយកីឡាករ ងួន សុខក្រៃលែង, កីឡាករ ស្រៀងវិរៈ, និងកីឡាការិនី ឆន ស្រីភា, ខណៈមេដាយសំរឹទ្ធិលើវិញ្ញាសាឯកត្តជនដណ្តើមបានដោយកីឡាការិនី សំណាង ឧត្តរ៉ា, កីឡាករ ជ្រុន វិរៈបុត្រ, និងកីឡាករ ប៊ិន ម៉េងលី។ ចំពោះមេដាយសំរឹទ្ធិ១គ្រឿងទៀត(ជាក្រុម)ដណ្តើមបានដោយកីឡាការិនី ឆន ស្រីភា, កីឡាការិនី វ៉ាន់ ចរិយា, កីឡាការិនី លឹម សុខវិច្ឆិកា, និងកីឡាការិនី ភួង សុផល។

ព្រឹត្តិការណ៍ Thailand Open Karate-DO Championship 2022 កម្ពុជាបានបញ្ជូនប្រធានប្រតិភូ១រូប អនុប្រធានប្រតិភូ១រូប នាយកបច្ចេកទេស១រូប ជំនួយការបច្ចេកទេស២រូប អាជ្ញាកណ្តាល៣រូប គ្រូបង្វឹក គ្រូជំនួយ ៦រូប កីឡាករ-កីឡារិនី៣៦នាក់។

បើតាមការឱ្យដឹងពីឯកឧត្តម វ៉ាត់ ចំរើន អគ្គលេខាធិការ សហព័ន្ធកីឡាការ៉ាតេកម្ពុជាធ្លាប់បញ្ជាក់ថា ដើម្បីត្រៀមលក្ខណៈឱ្យបានគ្រប់ជ្រុងជ្រោយនៃដំណើរឆ្ពោះទៅរៀបចំធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ សហព័ន្ធកីឡាការ៉ាតេកម្ពុជា ក្រោមការដឹកនាំរបស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានសហព័ន្ធតែងតែផ្តល់ការណែនំា និងលើកទឹកចិត្តដល់អ្នកជំនាញសហព័ន្ធ រួមទាំងគ្រូបង្វឹកកីឡាករ កីឡាការិនីជម្រើសជាតិខិតខំឱ្យរឹងមាំ ដើម្បីជោគជ័យស៊ីហ្គេម ២០២៣៕