ជប៉ុនបន្តដាក់ប្រទេសក្នុងភាពអាសន្នរហូតដល់ចុងខែឧសភា

នាយករដ្ឋមន្រ្តីជប៉ុនលោក ស៊ីនហ្សូ អាបេ (Shinzo Abe) បានប្រកាសថា ជប៉ុននឹងបន្តដាក់ប្រទេសក្នុងភាពអាសន្នជិតមួយទៀត ពោលគឺរហូតដល់ថ្ងៃទី៣១ ខែឧសភាតែម្តង ដោយសារជប៉ុនកំពុងប្រឈមការរាតត្បាតនៃវីរុសកូវីដ១៩នៅឡើយ។ នេះបើយោងតាមការចុះផ្សាយរបស់សារព័ត៌មាន NHK ម្សិលមិញនេះ។

ឧសភា 5, 2020 03:05 1458

ជប៉ុនបន្តដាក់ប្រទេសក្នុងភាពអាសន្នរហូតដល់ចុងខែឧសភា

ក្រុមរដ្ឋមន្ត្រីជប៉ុនបានយល់ព្រមសម្រេចពន្យាពេលនៃការដាក់ប្រទេសក្នុងភាពអាសន្នរហូតដល់ថ្ងៃទី ចុងខែឧសភានេះ ដោយផ្អែកលើហេតុផលថា ប្រព័ន្ធសុខាភិបាលរបស់ខ្លួនស្ថិតនៅក្នុងស្ថានភាពតានតឹងនៅឡើយ ខណៈមានការថយចុះនូវចំនួនអ្នកឆ្លងថ្មីជារៀងរាល់ថ្ងៃ តែយ៉ាងណានៅតិចជាងការរំពឹងទុកនៅឡើយ។

រដ្ឋាភិបាលនឹងស្នើក្រុមអ្នកជំនាញប្រឹក្សាយោបល់ ដើម្បីពិភាក្សាលើការពង្រីកផែនការកាលពីថ្ងៃច័ន្ទ មុនពេលបញ្ចប់កិច្ចប្រជុំជាមួយក្រុមការងារនៅពេលក្រោយ។

បន្ថែមពីនេះ រដ្ឋាភិបាលក៏មានផែនការកែប្រែគោលការណ៍ណែនាំជាមូលដ្ឋានរបស់ខ្លួនក្នុងគោលបំណងទប់ស្កាត់មេរោគនេះមិនឱ្យរីករាលដាលបន្ថែមទៀតផងដែរ។

សូមរម្លឹកផងដែរថា កាលពីថ្ងៃទី ៧ ខែមេសា កន្លងទៅ ជប៉ុនបានប្រកាសដាក់ទីក្រុង តូក្យូ និងខេត្តក្រុងធំៗចំនួន៦ទៀតក្នុងភាពអាសន្ន។ ក្រោយមករដ្ឋាភិបាលជប៉ុនបានប្រកាសដាក់ប្រទេសទាំងមូល ក្នុងភាពអាសន្នសម្រាប់រយៈពេលមួយខែតែម្តង ហើយពេលនេះ ជប៉ុនបានប្រកាសបន្តដាក់ប្រទេសស្ថិតក្នុងភាពអាសន្នដដែលរហូតដល់ថ្ងៃទី៣១ ខែឧសភា។

គិតមកទល់ពេលនេះ ករណីឆ្លងវីរុសកូវីដ១៩សរុបនៅទូទាំងប្រទេសជប៉ុនបានកើនឡើងចំនួនជាង ១៥,២៥៣ នាក់ហើយ ខណៈមានអ្នកស្លាប់ចំនួន៥៥៦នាក់៕

ប្រភព៖ NHK ប្រែសម្រួល៖ ជា បញ្ញា