[វីដេអូ] Ep.75 ប្រធានបទ៖សញ្ញានៃជំងឺរបេង

ជំងឺរបេងភាគច្រើនតែងតែកើតទៅលើផ្លូវដង្ហើម ជាពិសេសកើតមានជាជំងឺរបេងសួត ប៉ុន្តែទោះជាយ៉ាងណាក៏ដោយជំងឺរបេងក៏អាចកើតមាននៅទីតាំងផ្សេងៗឬសរីរាង្គផ្សេងៗក្រៅអំពីសួតផងដែរ មានដូចជា ជំងឺរបេងកូនកណ្តុល របេងស្រោមខួរ របេងឆ្អឹង របេងនៅតាមសន្លាក់ នៅតាមស្បែកនិងទីតាំងផ្សេងៗទៀតនៃសារពាង្គកាយរបស់មនុស្ស។

កុម្ភៈ 7, 2023 07:28 490

រោគសញ្ញា
រោគសញ្ញានៃជំងឺរបេង បើទោះបីជាជំងឺរបេងនោះស្ថិតនៅទីតាំងណាមួយនៃរាងកាយក៏ដោយរោគសញ្ញាដែលឃើញជាញឹកញាប់រួមមាន អស់កម្លាំង បាយមិនបាន ក្តៅខ្លួន ក្អកមានស្លេះ បែកញើសស្អិត ជាពិសេសនៅពេលរសៀលឬពេលយប់អ្នកជំងឺមានការស្រកគីឡូបន្តិចម្ដងៗ ដោយមិនដឹងមូលហេតុ ។នេះជារោគសញ្ញារួម ដែលឃើញថាទោះជាជំងឺរបេងគាត់ប៉ះទង្គិចនៅសរីរាង្គឬផ្នែកមួយណានៃខ្លួនរបស់យើងក៏ដោយសញ្ញាទាំងអស់នេះតែងកើតមានជានិច្ច។

កត្តាបង្ក មុននឹងឈានទៅដល់ការវិវត្តន៍ទៅរកជំងឺរបេង ដូចដែលបានដឹងរួចមកហើយថារបេងជាជំងឺឆ្លងតាមរយៈខ្យល់។ មុនឈានទៅដល់ការបង្កទៅជាជំងឺរបេង គឺមានការសង្ងំខ្លួនរបស់មេរោគរបេងនៅក្នុងខ្លួន ហើយការសង្ងំខ្លួនរបស់មេរោគរបេងនៅក្នុងខ្លួនមនុស្សម្នាក់ៗគឺមានការប្រែប្រួលអាចចន្លោះពីរាប់ខែ រហូតដល់រាប់ឆ្នាំនៅក្នុងខ្លួនមនុស្សម្នាក់នោះ ហើយវានឹងវិវត្តន៍ក្លាយទៅជាជំងឺរបេងនៅពេលណាមួយដែលប្រព័ន្ធភាពសុំារបស់អ្នកជំងឺមានការថយចុះ៕