សូមប្រុងប្រយ័ត្ន! ទឹកស្ទឹងសែនបន្តហក់ឡើងលើសកម្ពស់ប្រកាសអាសន្ន

រដ្ឋបាលខេត្តព្រះវិហារ កាលពីថ្ងៃទី២៦កញ្ញាឆ្នាំ២០២១ បានប្រកាសជូនដំណឹង ស្តីពីស្ថានភាពកម្ពស់ទឹកស្ទឹងសែន និងការចូលរួមទប់ស្កាត់ នូវគ្រោះមហន្តរាយដោយសារជំនន់ទឹកភ្លៀង និងដើម្បីធានាសុវត្ថិភាព និងបង្ការ នូវគ្រោះថ្នាក់ផ្សេងៗដែលអាចកើតមាន ឡើងជាយថាហេតុ ។សូមបងប្អូនប្រជាពលរដ្ឋក្នុងខេត្តទាំងអស់ ជាពិសេស ប្រជាពលរដ្ឋដែលកំពុងរស់នៅតាមដងស្ទឹងសែន មាត់ទន្លេមេគង្គ ដែលងាយរងគ្រោះដោយសារទឹកជំនន់ ត្រូវបង្កើនការប្រុងប្រយ័ត្នខ្ពស់ និងត្រូវស្វែងរកទីទួលមានសុវត្ថិភាពដែលនៅជិត ចៀសវាងកើតមានឡើងនូវគ្រោះថ្នាក់ផ្សេងៗ។

ប្រសិនបើបងប្អូនប្រជាពលរដ្ឋ ជួបគ្រោះទឹកជំនន់ ត្រូវរាយការផ្តល់ព័ត៌មានឲ្យបានឆាប់បំផុត ដល់អាជ្ញាធរភូមិ ឃុំ-សង្កាត់ ក្រុង ស្រុក ខេត្តជាបន្ទាន់ ដើម្បីអាជ្ញាធរមានលទ្ធភាព ចាត់វិធានការដោះស្រាយ ការពារ និងសង្គ្រោះឲ្យបានទាន់ពេលវេលា។

សូមជម្រាបថា យោងតាមការជូនដំណឹងរបស់រដ្ឋបាលខេត្ត បានបញ្ជាក់ថា ដោយសារ ព្រះរាជាណាចក្រកម្ពុជា បានទទួលរងនូវឥទ្ធិពលប្រព័ន្ធសម្ពាធទាប ITCZ ដែលអូសបន្លាយកាត់លើជួរភ្នំដងរែក និងខ្ពង់រាបឦសាន ជាមួយនឹងខ្យល់មូសុងនិរតី បក់នៅក្នុងល្បឿនមធ្យមទៅបង្គួរ ។

ស្ថានភាពបែបនេះ ធ្វើឲ្យខេត្តព្រះវិហារ មានភ្លៀងធ្លាក់ក្នុងកម្រិតពីមធ្យមទៅខ្លាំងជាប់ៗគ្នា ក្នុងរយៈពេលប៉ុន្មានថ្ងៃនេះ ដែលបានធ្វើឲ្យទឹកស្ទឹងសែនហក់ឡើងខ្លាំង លើសពីកម្រិតដែលត្រូវប្រកាសអាសន្ន ។

រដ្ឋបាលខេត្តព្រះវិហារ មានក្តីសង្ឃឹមជឿជាក់ថា បងប្អូនប្រជាពលរដ្ឋ នឹងមានការប្រុងប្រយ័ត្ន បង្កើនការយកចិត្តទុកដាក់ខ្ពស់ ចំពោះស្ថានភាពកម្ពស់ទឹកទន្លេ និងទឹកស្ទឹងសែន ដែលកំពុងបន្តហក់ឡើងជាបន្តបន្ទាប់នេះ និងក៏សូមអំពាវនាវជាថ្មី សូមឲ្យបងប្អូនប្រជាពលរដ្ឋ ចូលរួមសហការជាមួយអាជ្ញាធរដែនដី ក្នុងការបង្ការ និងទប់ស្កាត់គ្រោះថ្នាក់ជាយថាហេតុផ្សេងៗ ដែលបណ្តាលមកពីជំនន់ទឹកភ្លៀង ឲ្យមានប្រសិទ្ធភាពខ្ពស់ ៕

សូមចុច join Telegram https://t.me/cngtvcambodia

ប្រភព: ក្រសួងព័ត៌មាន