វិបត្តិឈូងសមុទ្រ និងភាពតានតឹងនៅតំបន់មជ្ឈិមបូព៌ា

ស្ថានភាពតានតឹងនៅមជ្ឈិមបូព៌ាបានឈានដល់ចំណុចប្រកាសអាសន្នថ្មីមួយទៀត ខណៈដែលទីក្រុងតេហេរ៉ង់បានប្តេជ្ញាធ្វើឱ្យសហរដ្ឋអាមេរិក «ស្តាយក្រោយ» ចំពោះការវាយប្រហារលើខ្លួន។

មិនា 13, 2026 10:57 20

វិបត្តិឈូងសមុទ្រ និងភាពតានតឹងនៅតំបន់មជ្ឈិមបូព៌ា

ការគំរាមកំហែងបិទច្រកសមុទ្រ Hormuz ជាអចិន្ត្រៃយ៍ កំពុងធ្វើឱ្យទីផ្សារថាមពលពិភពលោកមានការរង្គោះរង្គើយ៉ាងខ្លាំង។
កាលពីថ្ងៃព្រហស្បតិ៍កន្លងទៅ ប្រធានផ្នែកសន្តិសុខជាតិអ៊ីរ៉ង់ លោក Ali Larijani បានបង្ហោះសារនៅលើបណ្តាញសង្គម X ដោយព្រមានចំៗទៅកាន់ទីក្រុងវ៉ាស៊ីនតោនថា «ការចាប់ផ្តើមសង្គ្រាមគឺជារឿងងាយស្រួល ប៉ុន្តែវាមិនអាចបញ្ចប់ទៅវិញដោយគ្រាន់តែការសរសេរសារលើបណ្តាញសង្គមនោះទេ»។ លោកបានបន្ថែមថា អ៊ីរ៉ង់នឹងមិនដកថយឡើយ រហូតទាល់តែសហរដ្ឋអាមេរិកដឹងខ្លួនថាពួកគេធ្វើខុសយ៉ាងធ្ងន់ធ្ងរ។
ការថ្លែងបែបនេះធ្វើឡើងបន្ទាប់ពីមេដឹកនាំកំពូលថ្មីរបស់អ៊ីរ៉ង់ លោក Mojtaba Khamenei (មុត្ឆតាបា ខាមេណី) ដែលទើបឡើងកាន់តំណែងជំនួសឪពុករបស់លោក បានចេញសេចក្តីថ្លែងការណ៍ដំបូងបង្អស់ដើម្បីអំពាវនាវឱ្យមានការសងសឹក។ លោកបានសង្កត់ធ្ងន់ថា អ៊ីរ៉ង់ត្រូវតែប្រើប្រាស់ «អាវុធយុទ្ធសាស្ត្រ» ក្នុងការបិទច្រកសមុទ្រ Hormuz ដែលជាផ្លូវទឹកដ៏សំខាន់សម្រាប់ដឹកជញ្ជូនប្រេងដល់ទៅ ១ ភាគ ៤ នៃតម្រូវការពិភពលោក។
ទីភ្នាក់ងារថាមពលអន្តរជាតិ (IEA) បានព្រមានថា សង្គ្រាមនេះអាចបង្កឱ្យមាន «ការរអាក់រអួលនៃការផ្គត់ផ្គង់ប្រេងដ៏ធំបំផុត» ក្នុងប្រវត្តិសាស្ត្រ។ អ្នកវិភាគមួយចំនួនបារម្ភថា តម្លៃប្រេងអាចនឹងហក់ឡើងដល់ ២០០ ដុល្លារក្នុងមួយបារ៉ែល ប្រសិនបើជម្លោះនៅតែបន្តរីកធំ។
ទោះជាយ៉ាងណាក៏ដោយ ប្រធានាធិបតីអាមេរិក លោក ដូណាល់ ត្រាំ បានឆ្លើយតបវិញថា ការកម្ចាត់ «អាណាចក្របិសាច» របស់អ៊ីរ៉ង់ គឺមានសារៈសំខាន់ជាងបញ្ហាតម្លៃប្រេងឆៅទៅទៀត៕