តំបន់ភាគខាងត្បូងនឹងផ្ទុះកក្រើកខ្លាំងលើគម្រោងសំណង់លំនៅឋាន ក្រោយវត្តមានផ្សារAEON ទី៣

កុម្ភៈ 28, 2020 08:36 1617

អ្នកជំនាញផ្នែកអចលនទ្រព្យបានលើកឡើងថា តំបន់ភាគខាងត្បូងនៃរាជធានីភ្នំពេញ នឹងក្លាយជាគោលដៅទាក់ទាញបន្ថែមទៀតសម្រាប់អ្នកអភិវឌ្ឍន៍អចលនទ្រព្យ ជាពិសេសសំណង់លំនៅឋាន បន្ទាប់ពីគម្រោងអភិវឌ្ឍន៍ផ្សារទំនើប អ៊ីអនទី៣ ប្រកាសគម្រោងសាងសង់ជាផ្លូវការ។

គួរបញ្ជាក់ថា កាលពីថ្ងៃទី២៥ ខែធ្នូ ឆ្នាំ២០១៩ ក្រុមប្រឹក្សាអភិវឌ្ឍន៍កម្ពុជាបានសម្រេច អនុម័ត គម្រោងសាងសង់ផ្សារទំនើប AEON MALL ទី៣ ដែលមានទីតាំងស្ថិតនៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ក្នុងទុនវិនិយោគប្រមាណ ២៨៩,៦លានដុល្លារអាមេរិក និងអាចបង្កើតការងារបានចំនួន ៤៧កន្លែង។

ថ្លែងប្រាប់ KHB Media អគ្គនាយកក្រុមហ៊ុន Estate Xchange Cambodia លោក រស់ សុវណ្ណថា បានលើកឡើងថា តំបន់ភាគខាងត្បូងរាជធានីភ្នំពេញ ចន្លោះពីផ្លូវ៦០ម៉ែត្រដល់តំបន់គួរស្រូវ កំពុងទទួលបានគម្រោង វិនិយោគធំៗជាច្រើន ហើយវិស័យអចលនទ្រព្យនៅតំបន់ភាគខាងត្បូង ក៏មានការរីកចម្រើនគួរឲ្យកត់សម្កាល់ផងដែរ។

លោកបន្តថា គម្រោងលំនៅឋាន នឹងមានសន្ទុះខ្លាំងជាងគេ ដោយសារតំបន់ភាគត្បូងមានផ្សារទំនើប AEON MALL ទី៣ ហើយនៅតំបន់នោះ ដីធំទូលាយ និងនៅដីទំនេរច្រើន។ លោកយល់ថាតំបន់នោះនឹងមានការវិវឌ្ឍលើផ្នែកលំនៅឋានពីសំណាក់គម្រោងធំៗដូចទៅ នឹងតំបន់ភ្នំពេញថ្មី ខណ្ឌសែនសុខ ដែលមានAEON MALL ទី២ផងដែរ។

លោកបានបន្ថែមថា តម្លៃដីក្នុងតំបន់នេះ ក៏មានការកើនឡើងគួរឲ្យកត់សម្គាល់ដែរ ពោលគឺនៅតាមបណ្ដោយផ្លូវធំអាចមានតម្លៃចាប់ពី ៧០០ដុល្លារ ដល់ ១ ០០០ដុល្លារក្នុងមួយម៉ែត្រការ៉េ ខណៈដែលដីនៅផ្លូវ៦០ម៉ែត្រ មានតម្លៃចាប់ពី ១ ៥០០ ក្នុងមួយម៉ែត្រការ៉េឡើងទៅ។

ប៉ុន្តែទោះជាយ៉ាងណា លោកបានបញ្ជាក់ថា៖«តម្លៃអចលនទ្រព្យនៅតំបន់ AEON MALLទី៣ មិនសូវមានការប្រែប្រួលខ្លាំងប៉ុន្មានទេ ប៉ុន្តែ លោកបានសង្កត់ធ្ងន់ថាក្រៅពីផ្ទុះកក្រើកខ្លាំងលើការវិនិយោគលើការសាងសង់បុរីលំនៅឋាន គម្រោងខុនដូក្នុងតម្លៃសមរម្យ នៅតាមបណ្តោយផ្លូវ៦០ម៉ែត្រ នឹងមានការវិនិយោគខ្លាំងជាងមុនផងដែរ។

ទន្ទឹមនេះ លោកបណ្ឌិត គីម ហ៊ាង ប្រធានក្រុមហ៊ុន ខ្មែររៀលអ៊ីស្ទេត និងជាប្រធានក្រុមហ៊ុន KW Cambodia បានគូសបញ្ជាក់ដែរថា នៅឆ្នាំ២០១៩នេះ បន្ទាប់ពីការប្រកាសជាផ្លូវការនៅគម្រោង AEON MALLទី៣ នៅតំបន់ភាគខាងត្បូងនេះ កន្លងមកក៏គេសង្កេតឃើថា ការអភិវឌ្ឍលំនៅឋាននៅតំបន់ជាយរាជធានីភ្នំពេញ ពិសេសតំបន់ភាគត្បូង គឺមានការកើនឡើងច្រើនគួរឲ្យកត់សម្គាល់ផងដែរ ដោយសារតែសក្ដានុពលនៃទីតាំង និងប្រព័ន្ធផ្លូវខ្វាត់ខ្វែង។

មិនតែប៉ុណ្ណោះ លោកបន្ថែមទៀតថា៖«តំបន់នេះនឹងមានប្រជាជនចូលមករស់នៅកាន់តែច្រើននិងមានគម្រោងអភិវឌ្ឍធំៗជាច្រើនទៀត នឹងចូលមកអភិវឌ្ឍជាបន្តបន្ទាប់។

ផ្សារទំនើប AEON MALLទី៣ នឹងត្រូវចាប់ផ្តើមសាងសង់នៅឆ្នាំ២០២០ ខាងមុននេះ។ ផ្សារទំនើបទី៣របស់ក្រុមហ៊ុនAEON គឺនឹងមានផ្ទៃក្រឡាសរុបរហូតដល់ទៅ ១៧៤០០០ ម៉ែត្រការ៉េដែលនេះគឺធំជាងផលបូកផ្ទៃក្រឡាផ្សារទំនើបAEON ទី១ (៦៨០០០ ម៉ែត្រការ៉េ) និងផ្សារទំនើបAEON ២ សែនសុខ (១០០០០០ ម៉ែត្រការ៉េ) ដែលទំហំសរុបមានត្រឹមតែ ១៦៨០០០ម៉ែត្រការ៉េ។

ទន្ទឹមនឹងនេះដែរ ផ្សារទំនើបទី៣របស់ AEON ដែលមានទីតាំងតាមបណ្តោយផ្លូវ៦០ម៉ែត្រឬមហាវិថីសម្តេចតេជោ ហ៊ុន សែនមួយនេះគឺនឹងដាក់ឲ្យដំណើរការក្នុងឆ្នាំ២០២៣ខាងមុខនេះ។នេះបើតាមសេចក្តីជូនដំណឹងរបស់ក្រុមហ៊ុននេះ កាលពីពេលកន្លងទៅ៕