ប្រសិនបើចំនួនអ្នកឆ្លងមានការកើនឡើងច្រើនទៅៗ សម្ដេចតេជោគ្រោងនឹងដាក់ឲ្យមានការព្យាបាលកូវីដ-១៩ នៅតាមផ្ទះ

(ភ្នំពេញ)៖ សម្ដេចតេជោ ហ៊ុន សែន នាយករដ្ឋមន្ត្រី នាព្រឹកថ្ងៃទី៦ ខែមេសា ឆ្នាំ២០២១នេះ បានស្នើឲ្យគណ:កម្មការអន្តរក្រសួងប្រឆាំងកូវីដ-១៩ ត្រៀមរៀបចំក្រុមប្រតិបត្តិ សម្រាប់ឈានទៅព្យាបាលកូវីដ-១៩ នៅតាមផ្ទះ ដូចបណ្ដាប្រទេសធំៗមួយចំនួន ដែលមានអ្នកឆ្លងកូវីដកើនឡើងច្រើនហួស ពីចំនួនគ្រូពេទ្យដែលអាចទទួលព្យាបាលបាន ដោយទទួលយកទៅព្យាបាលនៅមន្ទីរពេទ្យ ចំពោះតែអ្នកជំងឺធ្ងន់ប៉ុណ្ណោះ។

មេសា 6, 2021 04:11 1185

ប្រសិនបើចំនួនអ្នកឆ្លងមានការកើនឡើងច្រើនទៅៗ សម្ដេចតេជោគ្រោងនឹងដាក់ឲ្យមានការព្យាបាលកូវីដ-១៩ នៅតាមផ្ទះ

តាមរយៈសារបន្ទាន់ថ្មីនេះ សម្ដេចតេជោនាយករដ្ឋមន្ត្រីបានមានប្រសាសន៍ថា ការត្រៀមបែបនេះក្នុងករណីមានអ្នកជាតិច តែអ្នកឆ្លងច្រើន ដូច្នេះវិធីដោះស្រាយមានតែទុកអ្នកដែលមានវិជ្ជមានកូវីដ ប៉ុន្តែស្រាលទុកព្យាបាលនៅតាមផ្ទះទៅវិញ ប៉ុន្តែត្រូវតែមានការវិនិច្ឆ័យឲ្យបានច្បាស់ ដែលការវិនិច្ឆ័យនោះ បើតាមយោបល់សម្ដេចស្ថិតនៅលើចំណុច២ នោះអ្នកដែលត្រូវទុកនៅតាមផ្ទះត្រូវតែមានជំងឺស្រាល និងមានផ្ទះសមរម្យដែលអាចព្យាបាលបាន។ រីឯអ្នកជំងឺធ្ងន់ត្រូវតែនាំយកមកកាន់មន្ទីរពេទ្យ។ មួយវិញទៀតអ្នកជំងឺស្រាល ប៉ុន្តែផ្ទះរបស់គាត់មានទំហំតូច ដែលអាចឆ្លងរាលដាលដល់ទៅកាន់គ្រួសារ ក៏ត្រូវតែនាំគាត់មកកាន់មន្ទីរពេទ្យដែរ។

សម្ដេចតេជោ បានបន្ថែមថា យ៉ាងហោចណាស់យើងក៏មាន ៥០% នៃអ្នកជំងឺដែលមានលទ្ធភាព និងចង់ព្យាបាលនៅតាមផ្ទះផងដែរ ដោយយើងគ្រាន់តែរៀបចំនូវក្រុមប្រតិបត្តិដើម្បីតម្រូវថា តើអ្នកជំងឺត្រូវធ្វើដូចម្ដេច សហគមន៍ អាជ្ញាធរមូលដ្ឋានត្រូវជួយមើលថែទាំគាត់របៀបម៉េច ដើម្បីកុំឲ្យគាត់ចេញក្រៅផ្ទះ។ ក្រុមគ្រូពេទ្យត្រូវទៅព្យាបាលគាត់ត្រូវធ្វើរបៀបម៉េច រួមនឹងការងារដទៃទៀតដែលមានការពាក់ព័ន្ធ។

សម្ដេចតេជោ ហ៊ុន សែន បានគូសបញ្ជាក់បន្ថែថា យើងនឹងអាចឈានទៅដល់ដំណាក់កាលនោះ ក្នុងករណីដែលព្រឹត្តិការណ៍ ២០កុម្ភៈ មិនមានការថមថយដូចក្នុងពេលនេះ ជាពិសេសក្នុងពេលដែលវាបាននឹងកំពុងកើតនៅភ្នំពេញនេះ។

ដោយឡែកចំពោះអ្នក ដែលនឹងត្រូវព្យាបាលតាមផ្ទះ សម្តេចតេជោ បានណែនាំដល់អាជ្ញាធរឲ្យសម្រួលរៀបចំជូនពួកគាត់ ដើម្បីពួកគាត់រស់នៅបានស្រួល ក្រៅពីការព្យាបាលអាចជួយឧបត្ថម្ភដល់ពួកគាត់ តាមរបៀបដូចធ្វើចត្តាឡីស័កដោយក្នុង ១ថ្ងៃជូន ២ម៉ឺនរៀលសម្រាប់ហូបចុកនានា ដើម្បីឲ្យអ្នកផ្ទះគាត់ជួយរៀបចំម្ហូបអាហារជូនពួកគាត់ ដើម្បីបំប៉នសម្រាប់ការព្យាបាល៕

ប្រភព: ក្រសួងព័ត៌មាន