ចិនជួបគ្រោះទឹកជំនន់នៅតំបន់ Guangxi ដោយសារឥទ្ធិពលខ្យល់ព្យុះ និងភ្លៀងធ្លាក់ខុសប្រក្រតី

នៅថ្ងៃទី ២៧ ខែមេសា ឆ្នាំ ២០២៦ ស្ថានភាពអាកាសធាតុនៅប្រទេសចិនកំពុងមានភាពវាយប្រហារយ៉ាងខ្លាំង ដោយសារឥទ្ធិពលនៃភ្លៀងធ្លាក់ខុសប្រក្រតី។ គិតមកទល់ពេលនេះ តំបន់ស្វយ័តក្វាងស៊ី (Guangxi) នៅភាគខាងត្បូងប្រទេសចិន កំពុងប្រឈមមុខនឹងគ្រោះទឹកជំនន់យ៉ាងធ្ងន់ធ្ងរ ដែលបង្ខំឱ្យមានការជម្លៀសប្រជាពលរដ្ឋជាបន្ទាន់។

មេសា 29, 2026 03:04 25

ចិនជួបគ្រោះទឹកជំនន់នៅតំបន់ Guangxi ដោយសារឥទ្ធិពលខ្យល់ព្យុះ និងភ្លៀងធ្លាក់ខុសប្រក្រតី

យោងតាមការចុះផ្សាយពីអាជ្ញាធរមូលដ្ឋាន ភ្លៀងធ្លាក់យ៉ាងជោគជាំ និងខ្យល់ព្យុះសង្ឃរាបានបង្កឱ្យមានទឹកជំនន់រីករាលដាលយ៉ាងឆាប់រហ័ស។ កម្រិតទឹកជំនន់ត្រូវបានគេរាយការណ៍ថា បានហក់ឡើងខ្ពស់រហូតដល់ ១.៥ ម៉ែត្រ ដែលធ្វើឱ្យផ្ទះសម្បែង និងយានយន្តជាច្រើនគ្រឿងត្រូវលិចលង់ទាំងស្រុង។

នៅក្នុងប្រតិបត្តិការសង្គ្រោះបន្ទាន់ កងកម្លាំងចម្រុះបានប្រើប្រាស់ទូកជ័រកៅស៊ូ ដើម្បីចូលទៅជួយសង្គ្រោះប្រជាពលរដ្ឋដែលជាប់គាំងតាមខ្នងផ្ទះ។ រហូតមកដល់ពេលនេះ មានមនុស្សជាង ៨០០ នាក់ ហើយត្រូវបានជម្លៀសទៅកាន់ទីទួលសុវត្ថិភាព ខណៈដែលអ្នកភូមិមួយចំនួនទៀតនៅតែបន្តជាប់គាំងនៅក្នុងអគារខ្ពស់ៗនៅឡើយ។

ទន្ទឹមនឹងនេះ ទីភ្នាក់ងារឧតុនិយមចិនបានបន្តចេញការព្រមានកម្រិតខ្ពស់ អំពីស្ថានភាពភ្លៀងធ្លាក់ខ្លាំង ដែលអាចនឹងបន្តកើតមានក្នុងរយៈពេលប៉ុន្មានថ្ងៃខាងមុខទៀត។ អាជ្ញាធរបានអំពាវនាវឱ្យប្រជាពលរដ្ឋបង្កើនការប្រុងប្រយ័ត្នខ្ពស់ចំពោះគ្រោះថ្នាក់ដែលបង្កឡើងដោយដីបាក់ និងជំនន់ឆាប់រហ័ស ជាពិសេសនៅតំបន់ទំនាប និងក្បែរជើងភ្នំ៕
ប្រភព៖ CNA