ក្រុមការងារ នៃនាយកដ្ឋានអភិរក្សប្រាសាទក្រៅ និងក្នុងឧទ្យានអង្គរ នៃអាជ្ញាធរជាតិអប្សរា សម្រេចរួចរាល់ក្នុងគម្រោងជួសជុលប្រាសាទផ្ទី!

សៀមរាប៖ លោក គឹម សុធិន អគ្គនាយករង នៃអាជ្ញាធរជាតិអប្សរា មានប្រសាសន៍ថា គម្រោងជួសជុលប្រាសាទផ្ទី បានសម្រេចរួចរាល់ហើយនៅចុងខែឧសភានេះ បន្ទាប់ពីចាប់ផ្តើមដំណើរការជួសជុលកាលពីដើមខែមេសាកន្លងមក។ កាលពីដើមខែមីនា ឆ្នាំ២០២១នេះដែរ ការធ្វើកំណាយពិនិត្យរចនាសម្ព័ន្ធប្រាសាទនេះបានចាប់ផ្តើម និងឈានដល់ការជួសជុលឡើងវិញតែម្តង ក្រោមការចូលរួមពីវិស័យឯកជន គឺលោកជំទាវហេមចិត្តាមហាឧបាសិកាពុទ្ធសាសនូបត្ថម្ភ ម៉ៅ ម៉ាល័យ កែ គឹមមយ៉ាន ក្នុងបំណង ដើម្បីចូលរួមអភិរក្សមរតកសម្បត្តិបេតិកភណ្ឌជាតិ ឱ្យឋិតស្ថេរគង់វង្ស សម្រាប់កូនចៅជំនាន់ក្រោយ។

មិថុនា 2, 2021 02:11 1436

ក្រុមការងារ នៃនាយកដ្ឋានអភិរក្សប្រាសាទក្រៅ និងក្នុងឧទ្យានអង្គរ នៃអាជ្ញាធរជាតិអប្សរា សម្រេចរួចរាល់ក្នុងគម្រោងជួសជុលប្រាសាទផ្ទី!

បើតាមការបញ្ជាក់ពីលោក គឹម សុធិន គម្រោងជួសជុលនេះមានការលំបាកបន្ដិចដែរ ព្រោះការដ្ឋានស្ថិតនៅកណ្ដាលបារាយណ៍ ក្នុងព្រៃ ហើយផ្លូវធ្វើដំណើរមានភាពតូចបន្ដិច ដែលពិបាកក្នុងការដឹកជញ្ជូនថ្មតាមរថយន្តធុនធ្ងន់។ យ៉ាងណាក៏ដោយ លោក គឹម សុធិន បានបង្ហាញសុទិដ្ឋិនិយម និងអារម្មណ៍រីករាយជាខ្លាំងជាមួយសមិទ្ធផលថ្មីមួយបន្ថែមទៀតនេះ ពិសេសប្រាសាទដែលបានដួលរលំឃើញតែគំនរដុំថ្មហើយបច្ចុប្បន្នបានខិតខំរកផ្គុំឱ្យមានរូបរាងយ៉ាងល្អប្រណិតឡើងវិញ។

សូមជម្រាបថា ប្រាសាទផ្ទីដែលស្ថិតនៅចំកណ្តាលបារាយណ៍ប្រាសាទបេងមាលា មានទីតាំងស្ថិតនៅភូមិបេងមាលា ឃុំបេងមាលា ស្រុកស្វាយលើ ខេត្តសៀមរាប។ ប្រាសាទនេះមានលក្ខណ:ជាសំណង់ថ្មបាយក្រៀម រាងការេប្រវែង១៥ម៉ែត្របួនជ្រុង និងមានជញ្ជាំងព័ទ្ធជុំវិញកម្ពស់១ម៉ែត្រ ។ នៅចំកណ្តាល គេតម្កល់រូបព្រះពុទ្ធប្រក់នាគសរុបទាំងខឿនកម្ពស់ ៦,៥ម៉ែត្រ ធ្វើអំពីថ្មភក់ ដែលទំនងជាត្រូវបានសាងសង់ឡើងរវាងពាក់កណ្ដាលសតវត្សទី១២ ទៅចុងសតវត្សទី១២៕