Mbappe នឹងបន្តនៅ PSG ខណៈ Real Madrid ដកខ្លួនចេញពីការចរចា

កីឡាករ Kylian Mbappe របស់ក្លឹប Paris Saint-Germain មិនអាចចូលរួមជាមួយក្រុម Real Madrid បាននៅឡើយទេនៅរដូវក្តៅនេះ បន្ទាប់ពី Real Madrid បានដកខ្លួនចេញពីការចរចា ។

ក្លឹប Real Madrid ដំបូងមានទំនុកចិត្តថាអាចឈានទៅដល់កិច្ចព្រមព្រៀងជាមួយ PSG ប៉ុន្តែដោយសារតែការទាមទាររបស់ PSG ក្នុងតម្លៃ ២០០ លានអឺរ៉ូ (១៧៥ លានផោន/២៣៥ លានដុល្លារ) ថ្លៃពេកទើបបដិសេធការចរចានោះ។ ខណៈពេលនេះ គឺស្ថិតក្នុងសភាពធម្មតា ហើយកុងត្រារបស់ Mbappe ដែលនៅបន្ត គឺរហូតដល់ចុងរដូវកាលនេះនៅទីក្រុងប៉ារីស ដូចនេះ Mbappe នឹងត្រូវបន្តរួបរួមជាមួយ Lionel Messi និង Neymar បន្តទៀត។

សូមជម្រាបថាកន្លងមក Real Madrid បានដាក់សំណើដេញថ្លៃ Mbappe ចំនួនពីរដង ហើយក៏ទទួលបានការបដិសេធ ពី PSG រួចហើយដែរ។ តម្លៃចុងក្រោយដែល Real បានដាក់សំណើរ មានតម្លៃ ១៧០ លានអឺរ៉ូ (១៤៦ លានផោន/២០០ លានដុល្លារ) បូករួមទាំងការបន្ថែម ១០ លានអឺរ៉ូ (៩ លានផោន/១២ លានដុល្លារ) ។ ក្លឹបយក្សអេស្ប៉ាញមួយនេះមានទំនុកចិត្តយ៉ាងមុតមាំ ថាការដេញថ្លៃលើកទី ២ នឹងគ្រប់គ្រាន់ដើម្បីនាំយកតារាឆ្នើមវ័យ ២២ ឆ្នាំរូបនេះ ខណៈដែល Mbappe ផ្ទាល់ក៏បានបញ្ជាក់យ៉ាងច្បាស់ថាគេចង់ផ្លាស់ទៅ Real Madrid ដូចគ្នា។

ទោះជាយ៉ាងណាក៏ដោយ PSG នៅតែមានជំហររឹងមាំ ហើយពេលនេះមើលទៅហាក់ដូចជាមិនមានកិច្ចព្រមព្រៀងណាមួយអាចធ្វើទៅបានមុនថ្ងៃកំណត់ផ្ទេរនៅថ្ងៃអង្គារនេះឡើយ ។ មានន័យថា Mbappe នឹងនៅតែជាកីឡាកររបស់ PSG ដដែលសម្រាប់ពេលនេះ។ អតីតខ្សែប្រយុទ្ធម៉ូណាកូ រូបនេះបានបដិសេធមិនបន្តកុងត្រាជាមួយ PSG មិនតិចជាង ៦ ដងនោះទេ ។ ហើយកុងត្រាច្ចុប្បន្នរបស់គេ នឹងផុតកំណត់នៅចុងបញ្ចប់នៃរដូវកាលនេះ ។ ក្លឹបបារាំងមួយនេះប្រឈមនឹងការបាត់បង់ Mbappe ដោយគ្មានទទួលបានអ្វីមកវិញសោះ។

សូមបញ្ជាក់ថា Real Madrid ត្រូវរង់ចាំរហូតដល់ខែមករាដើម្បីបើកការចរចាជាមួយ Mbappe បន្ទាប់មកពួកគេអាចចុះហត្ថលេខាលើកិច្ចព្រមព្រៀងទុកជាមុន ដើម្បីចូលរួមជាមួយ Real Madrid ក្នុងការផ្ទេរដោយឥតគិតថ្លៃនៅរដូវក្តៅក្រោយ។

សូមរម្លឹកផងដែរថា មិត្តរួមក្រុមរបស់ Mbappe មួយចំនួនក៏បានសម្តែងក្តីសង្ឃឹមរបស់ពួកគេថា ខ្សែប្រយុទ្ធរូបនេះនឹងបន្តនៅជាមួយ PSG បន្តទៀតផងដែរ៕

ប្រភព៖ GOAL