ចិនបានបញ្ជូនគណៈប្រតិភូមួយក្រុម រួមមានទាំងក្រុមគ្រូពេទ្យជំនាញផង ទៅកាន់កូរ៉េខាងជើង ស្របពេលដែលមានពាក្យចចារាមថាមេដឹកនាំកំពូលកូរ៉េខាងជើងលោក គីម ជុងអ៊ុន ឈឺជាទម្ងន់ ក្រោយវះកាត់បេះដូង

ចិនបញ្ចូនក្រុមគ្រូពេទ្យជំនាញ និងគណៈប្រតិភូរបស់ខ្លួន គឺធ្វើឡើងនៅចំពេលដែលមានការផ្ទុះពាក្យចរាមអារាម និងរបាយការណ៍ដ៏ចម្រូងចម្រាស់អំពីស្ថានភាពសុខភាពរបស់មេដឹកនាំរូបនេះ។

ប្រតិភូ​ចិន អមដោយ​អ្នក​ជំនាញ​វេជ្ជសាស្ត្រផង ដឹក​នាំ​ដោយ​តំណាង​ជាន់​ខ្ពស់​នៃការិយាល័យ​ទំនាក់ទំនង​អន្តរជាតិ​នៃ​បក្សកុម្មុយនិស្ត​ចិន បាន​ចាក​ចេញពីទីក្រុង​ប៉េកាំង នៅល្ងាច​ថ្ងៃព្រហស្បតិ៍​ទី ២៤​ ខែមេសា​។ ស្ថាប័ន​ចិន​ទទួល​បន្ទុក​ទំនាក់ទំនង​ជាមួយ​កូរ៉េខាង​ជើង និងក្រសួង​ការបរទេស​ចិន មិន​ធ្វើ​អត្ថាធិប្បាយ​អ្វី​ទាំង​អស់​ទាក់ទងនឹង​បេសកកម្ម​នេះ។

សារព័ត៌មាន Daily NK ដែលមានមូលដ្ឋាននៅកូរ៉េខាងត្បូង និងសារព័ត៌មានជាច្រើនទៀតរបស់សហរដ្ឋអាមេរិកបានចុះផ្សាយអត្ថបទកាលពីដើមសប្តាហ៍មុនថា មេដឹកនាំកំពូលរូបនេះ ទំនងកំពុងមានបញ្ហាសុខភាព ក្រោយ​ពី​ការ​វះកាត់​បេះដូង​រួចកាលពីថ្ងៃទី១២ ខែមេសា។

ជាមួយគ្នានេះ មន្ទិលសង្ស័យអំពីសុខភាពរបស់មេដឹកនាំកូរ៉េខាងជើងលោក គីម ជុងអ៊ុន បានកើតឡើងកាន់តែខ្លាំងក្រោយពេលដែលលោកអវត្តមាននៅក្នុងទិវារំលឹកខួបកំណើតរបស់បិតាស្ថាបនិកប្រទេសកូរ៉េខាងជើង លោក គីម អ៊ីលស៊ុង ដែលជាជីតារបស់លោក កាលពីថ្ងៃទី១៥ ខែមេសាកន្លងទៅ។

ទោះបីជាបែបនេះក្ដី ប្រព័ន្ធផ្សព្វផ្សាយរដ្ឋរបស់កូរ៉េខាងជើង មិនធ្វើអត្ថាធិប្បាយអ្វីឡើយចំពោះពាក្យចចាមអារ៉ាមអំពីសុខភាព និងទីកន្លែងរបស់លោក គីម ជុងអ៊ុន។

ជាមួយគ្នានេះ កាលពីថ្ងៃអាទិត្យម្សិលមិញទីភ្នាក់ងារសារព័ត៌មាន Reuters បានរាយការណ៍ថា រថភ្លើងពិសេសមួយគ្រឿងដែលគេសន្និដ្ឋានថាជារបស់មេដឹកនាំកូរ៉េខាងជើង លោក គីម ជុងអ៊ុន ត្រូវបានគេប្រទះឃើញតាមរយៈប្រព័ន្ធផ្កាយរណបរបស់គម្រោងឃ្លាំងមើលកូរ៉េខាងជើងដែលមានមូលដ្ឋាននៅទីក្រុងវ៉ាស៊ីងតោន ថាស្ថិតនៅទីក្រុង Wonsan តំបន់ឆ្នេរភាគខាងកើតនៃប្រទេស។

គម្រោងឃ្លាំងមើលដែលមានឈ្មោះថា 38 North បានរាយការណ៍កាលពីថ្ងៃសោរ៍កន្លងទៅថា គេប្រទះឃើញរថភ្លើងពិសេសបានចតនៅស្ថានីយរថភ្លើងក្នុងទីក្រុង Wonsan កាលពីថ្ងៃទី២១ និង២៣ ខែមេសា។ ស្ថានីយរថភ្លើងនេះអាចប្រើប្រាស់បានសម្រាប់តែគ្រួសារមេដឹកនាំត្រកូលគីម តែប៉ុណ្ណោះ។

ទោះបីជាយ៉ាងណាក៏ដោយ មកទល់នឹងពេលនេះ គេមិនដឹងច្បាស់នៅឡើយទេថាតើមេដឹកនាំកូរ៉េខាងជើង លោក គីម ជុងអ៊ុន ឈឺអ្វីឲ្យពិតប្រាកដ និងនៅកន្លែងណាឲ្យពិតប្រាកដ៕

ប្រភព៖ Reuters ដោយ៖ ចាប មិថុនា