ប្រមុខការទូតកម្ពុជា អញ្ជើញចូលរួមប្រជុំចង្អៀតថ្នាក់រដ្ឋមន្ត្រីការបរទេសអាស៊ាន តាមប្រព័ន្ឋវីដេអូ

MC៖ ឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្ត្រីការបរទេស និង សហប្រតិបត្តិការអន្តរជាតិនៃព្រះរាជាណាចក្រកម្ពុជា នឹងអញ្ជើញចូលរួមកិច្ចប្រជុំចង្អៀត ថ្នាក់រដ្ឋមន្ត្រីការបរទេសអាស៊ាន ដែលនឹងរៀបចំឡើងនៅព្រឹកថ្ងៃទី២១ ខែមករា ឆ្នាំ២០២១ តាមប្រព័ន្ឋវីដេអូ។

មករា 21, 2021 02:36 1418

ប្រមុខការទូតកម្ពុជា អញ្ជើញចូលរួមប្រជុំចង្អៀតថ្នាក់រដ្ឋមន្ត្រីការបរទេសអាស៊ាន តាមប្រព័ន្ឋវីដេអូ

យោងតាមសេចក្តីប្រកាសព័ត៌មានក្រសួងការបរទេស ដែលវិទ្យុជាតិកម្ពុជាទទួលបាន នៅថ្ងៃទី២០ ខែមករា ឆ្នាំ២០២១នេះ បានឱ្យដឹងថា គម្រោងអញ្ជើញចូលរួមប្រជុំចង្អៀត ថ្នាក់រដ្ឋមន្ត្រីការបរទេសអាស៊ាននេះ គឺបានធ្វើឡើងតបតាមការអញ្ជើញរបស់ ឯកឧត្តម ដាតូ អ៊ីរីវ៉ាន់ ពើហ៊ីន យូស៊ូហ៍ រដ្ឋមន្ត្រីការបរទេសប្រ៊ុយណេដារ៉ូសាឡឹម។

សេចក្តីប្រកាសបន្ដថា កិច្ចប្រជុំចង្អៀតនេះ នឹងពិនិត្យមើលការអនុវត្តផែនការ ការងារនានាដែលសម្រេចដោយថ្នាក់ដឹកនាំ នៅក្នុងកិច្ចប្រជុំកំពូលអាស៊ានលើកទី៣៧ ស្ដីពីការពិនិត្យមើលឡើងវិញ នូវផែនការលម្អិតរបស់អាស៊ាន វិធីនិងមធ្យោបាយនានា ដើម្បីសម្រេចបាននូវការកសាងសហគមន៍អាស៊ាន ដោយផ្អែកលើបរិបទសកលលោក នាពេលបច្ចុប្បន្ន និងជំងឺរាតត្បាតជាសកល នៃកូវីដ-១៩ និងកំណត់ទិសដៅចក្ខុវិស័យ សហគមន៍អាស៊ានក្រោយឆ្នាំ២០២៥ ។ ក្នុងនោះ រដ្ឋមន្ត្រីការបរទេសអាស៊ាន ក៏នឹងពិភាក្សាផងដែរ អំពីផែនការស្តារសេដ្ឋកិច្ចអាស៊ាន ក្រោយពីជំងឺកូវីដ-១៩ ព្រមទាំងការប្រាស្រ័យទាក់ទងជាមួយនឹងសហគមន៍ពិភពលោក។

សូមបញ្ជាក់ថា ប្រទេសប៊្រុយណេដារ៉ូសាឡឹម នឹងដឹកនាំដំណើរការកិច្ចប្រជុំអាស៊ាន នាឆ្នាំនេះ ក្រោមមូលបទ«យើងយកចិត្តទុកដាក់, យើងត្រៀមលក្ខណៈ, យើងរីកចម្រើន» ជាមួយនឹងចំណុចអាទិភាពគន្លឹះចំនួនបី ដែលផ្តោតជាសំខាន់ទៅលើ គោលការណ៍ ៣ចំណុច ដោយ

ទី១- ប្រកាន់ខ្ជាប់នូវវប្បធម៌យកចិត្តទុកដាក់របស់អាស៊ាន។

ទី២- ត្រៀមលក្ខណៈ និងសម្របខ្លួនសម្រាប់ពេលអនាគត

ទី៣- បង្កើតឱកាសសម្រាប់ កាលានុវត្តភាពរបស់ប្រជាជនអាស៊ាន៕

ប្រភព: ក្រសួងព័ត៌មាន