ម្ចាស់គ្រឹះស្ថានសិក្សាឯកជនស្វែងរកអន្តរាគមន៍ពីរដ្ឋាភិបាល

លោក ប៉ិច បូឡែន ប្រធានសហព័ន្ធសេវាអប់រំនៃកម្ពុជា និងជាអគ្គនាយកក្រុមហ៊ុន Westline Education Group (WEG) បានសម្តែងក្តីព្រួយបារម្ភចំពោះវិនិយោគិនលើវិស័យអប់រំឯកជន ដែលកំពុងមានកាតព្វកិច្ចដោះស្រាយបញ្ហាប្រឈមជាច្រើននៅក្នុងពេលនេះ។

មិនា 31, 2020 09:53 2015

ម្ចាស់គ្រឹះស្ថានសិក្សាឯកជនស្វែងរកអន្តរាគមន៍ពីរដ្ឋាភិបាល

Photo Credit: Forward KH

ភ្នំពេញ៖ លោក ប៉ិច បូឡែន ប្រធានសហព័ន្ធសេវាអប់រំនៃកម្ពុជា និងជាអគ្គនាយកក្រុមហ៊ុន Westline Education Group (WEG) បានសម្តែងក្តីព្រួយបារម្ភចំពោះវិនិយោគិនលើវិស័យអប់រំឯកជន ដែលកំពុងមានកាតព្វកិច្ចដោះស្រាយបញ្ហាប្រឈមជាច្រើននៅក្នុងពេលនេះ។ យោងតាមគណនីហ្វេសប៊ុកផ្លូវការរបស់លោក ប៉ិច បូឡែន រសៀលថ្ងៃទី៣១ មីនា ២០២០ មុននេះបន្តិចបានលើកឡើងយ៉ាងដូច្នេះថា៖

នៅអំឡុងពេលសម្រាកវិស្សមកាលតូចនេះ គ្រឹះស្ថានអប់រំឯកជនទាំងអស់បាន និងកំពុងប្រឹងប្រែងបន្តរការបង្រៀនពីចម្ងាយជូនសិស្ស និងនិស្សិតទាំងអស់ទៅតាមលទ្ធភាពដែលខ្លួនមាន។ គ្រឹះស្ថានអប់រំស្ទើរទាំងអស់ ជាពិសេសគ្រឹះស្ថានដែលទទួលថ្លៃសិក្សាប្រចាំខែ និងត្រីមាសកំពុងជួបបញ្ហាប្រឈមជាច្រើនលើការបើកប្រាក់ឈ្នួលជូនបុគ្គលិក គ្រូបង្រៀន ថ្លៃឈ្នួលអគារ និងកាតព្វកិច្ចចំណាយផ្សេងៗទៀត។

សូមអរគុណដល់រដ្ឋាភិបាលដែលបានអំពាវនាវអោយមានការយល់យោគពីម្ចាស់អគារ និងបានអន្តរាគមន៍គោលនយោបាយជាច្រើនដល់ធុរជនកម្ពុជា។ ពោលគឺ សម្តេចតេជោនាយករដ្ឋមន្ត្រីបានស្នើសុំឱ្យម្ចាស់អគារទម្លាក់តម្លៃជួល៥០ភាគរយ ឬពន្យាការបង់ថ្លៃ ក្នុងបរិបទនៃវិបត្តិដែលបង្កឡើងដោយការឆ្លងរាលដាលនៃជំងឺកូវីដ១៩នេះ។

សូមអរគុណដល់ក្រសួងសុខាភិបាលដែលបាននិងកំពុងដឹកនាំការងារប្រយុទ្ធប្រឆាំងការរាលដាលនៃជំងឺកូវីដ១៩ និងសូមអរគុណដល់ក្រសួងអប់រំដែលបានផ្តួចផ្តើមដំណើរការ ការគាំទ្ររៀនពីចម្ងាយជូនសិស្សចំណេះទូទៅខ្មែរ។

ដើម្បីនិរន្តភាពសាលារៀន ក៏ដូចជាស្ថេរភាពការងារបុគ្គលិក គ្រូបង្រៀនតាមគ្រឹះស្ថានអប់រំឯកជន សូមស្នើសុំស្ថាប័នពាក់ព័ន្ធ មេត្តាពិចារណាចាត់វិស័យអប់រំឯកជនដែលកំពុងផ្តល់ការងាររាប់ម៉ឺននាក់ និងផ្តល់ការសិក្សាដល់សិស្ស និស្សិតរាប់សែននេះ ជាវិស័យអទិភាពមួយផង និងសូមពិចារណាផ្តល់ជូនយន្តការពិសេសមួយចំនួន ដូចខាងក្រោមជូនគ្រឹះស្ថានអប់រំឯកជន៖

រៀបចំឥណទានឡើងវិញ ឬការផ្តល់ឥណទានបន្ថែមដែលមានភាពបត់បែន និងយល់យោគមួយ។
លើកលែងការបង់ប្រាក់របបបេឡាសន្តិសុខសង្គមរហូតដល់ស្ថានភាពប្រសើរជាថ្មី។
ផ្តល់ប្រាក់ឧបត្ថម្ភបន្ថែម២០%នៃប្រាក់ខែអប្បបរមា១៩០ដុល្លារដល់បុគ្គលិកអប់រំ និងគ្រូបង្រៀនដែលអាចនឹងទទួលរងផលប៉ះពាល់ពីការកាត់បន្ថយបៀវត្ស ការព្យួរការងារ ឬការផ្អាកសកម្មភាពអាជីវកម្ម។
ពន្យាពេលការរៀបចំសៀវភៅការងារបុគ្គលិកបរទេសក្នុងអំឡុងពេលនេះ។
ផ្តល់ជូនកញ្ចប់ថវិកាសមរម្យណាមួយសម្រាប់គ្រឹះស្ថានអប់រំដែលរងផលប៉ះពាល់ខ្លាំងដោយសារកូវីដ-១៩សម្រាប់ដំណើការគ្រឹះស្ថានឡើងវិញ។
សូមម្ចាស់អគារទាំងអស់ដាក់ចិត្តយល់ និងស្វែករកដំណោះស្រាយឈ្នះ-ឈ្នះមួយ ជាមួយម្ចាស់អាជីវកម្មក្នុងអំឡុងពេលនេះ។

លោក ប៉ិច បូឡែន បានសង្កត់ធ្ងន់ថា “ខ្ញុំជឿថា យើងទាំងអស់គ្នា រដ្ឋាភិបាល និងប្រជាជន វិស័យរដ្ឋ និងឯកជន សិស្សានុសិស្ស មាតាបិតា អ្នកអាណាព្យាបាល និងគ្រឹះស្ថានអប់រំ យើងទាំងអស់គ្នាជាប្រជាជនខ្មែរពិតជាអាចយកជ័យជម្នះក្នុងការទប់ស្កាត់ការរាលដាលនៃកូវីដ១៩នេះ ហើយនិងអាចបន្តការអភិវឌ្ឍធនធានមនុស្ស និងសេដ្ឋកិច្ចប្រទេសយើងអោយរីកចម្រើនបន្តដូចចិត្តយើងចង់បានទាំងអស់គ្នា”។

សូមរម្លឹកផងដែរថា សហព័ន្ធសេវាអប់រំនៃកម្ពុជាបានចូលរួម១ម៉ឺនដុល្លារ និង Westline Education Group ក៏បានចូលរួម១ម៉ឺនដុល្លារជាមួយសម្តេចនាយករដ្ឋមន្ត្រីក្នុងយុទ្ធនាការបង្ការ ទប់ស្កាត់ការរាលដាលជំងឺកូវីដ១៩៕

ដោយ៖ CNGTV CAMBODIA