សិង្ហបុរីពន្លឿនការប្រើប្រាស់ថាមពលបៃតង ខណៈដែលនៅមជ្ឈិមបូព៌ាមានភាពតានតឹង
ខណៈដែលភាពតានតឹងយោធានៅមជ្ឈិមបូព៌ាបានធ្វើឱ្យចរាចរណ៍នាវាតាមច្រកសមុទ្រ Hormuz ស្ទើរតែជាប់គាំងទាំងស្រុង អាជ្ញាធរកំពង់ផែ និងនាវាចរណ៍សិង្ហបុរី (MPA) បានមើលឃើញថា នេះគឺជាសញ្ញាអាសន្នមួយដែលជម្រុញឱ្យពិភពលោកត្រូវពន្លឿនការប្រើប្រាស់ "ប្រេងឥន្ធនៈស្អាត" ដើម្បីកាត់បន្ថយការពឹងផ្អែកលើប្រភពថាមពលដែលងាយរងគ្រោះ។
ចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយប្រហារលើអ៊ីរ៉ង់ ចរាចរណ៍នាវាដឹកប្រេង និងទំនិញតាមច្រកសមុទ្រ Hormuz បានធ្លាក់ចុះយ៉ាងគំហុក។ ច្រកសមុទ្រនេះគឺជាផ្លូវយុទ្ធសាស្ត្រដ៏សំខាន់បំផុតសម្រាប់ការនាំចេញប្រេង និងហ្គាសពីឈូងសមុទ្រពែរ្សទៅកាន់ពិភពលោក។
លោក Teo Eng Dih នាយកប្រតិបត្តិនៃ MPA បានលើកឡើងថា ទោះបីជាការហូរចូលនៃទំនិញមកកាន់សិង្ហបុរីនៅមានស្ថិរភាពក៏ដោយ ប៉ុន្តែវិបត្តិនេះបានបង្ហាញឱ្យឃើញពី "ភាពផុយស្រួយ" នៃខ្សែសង្វាក់ផ្គត់ផ្គង់ថាមពលសកលដែលពឹងផ្អែកខ្លាំងលើតំបន់តែមួយ។
ក្នុងបរិបទនៃអសន្តិសុខនេះ សិង្ហបុរីកំពុងប្រើប្រាស់វិបត្តិធ្វើជាឱកាសដើម្បី៖
១. ពន្លឿនថាមពលបៃតង៖ ជំរុញឱ្យឧស្សាហកម្មនាវាចរណ៍ងាកមកប្រើប្រាស់ប្រេងឥន្ធនៈកាបូនទាប និងថាមពលស្អាតផ្សេងទៀត ដែលមិនសូវរងឥទ្ធិពលពីជម្លោះភូមិសាស្ត្រនយោបាយនៅមជ្ឈិមបូព៌ា។
២. ការធ្វើឌីជីថលនីយកម្ម៖ ចាប់តាំងពីខែមេសា ឆ្នាំ២០២៥ សិង្ហបុរីបានដាក់ឱ្យប្រើប្រាស់សេវាផ្ដល់ប្រេង (Bunkering) តាមប្រព័ន្ធឌីជីថលទាំងស្រុង ដើម្បីបង្កើនប្រសិទ្ធភាព និងតម្លាភាពក្នុងប្រតិបត្តិការកំពង់ផែ។
៣. ការពង្រីកកំពង់ផែ Tuas៖ ការបន្តអភិវឌ្ឍកំពង់ផែស្វ័យប្រវត្តិ Tuas ដែលនឹងក្លាយជាកំពង់ផែស្វ័យប្រវត្តិធំបំផុតលើលោកនៅទសវត្សរ៍ឆ្នាំ ២០៤០ ដើម្បីពង្រឹងភាពធន់នៃសេដ្ឋកិច្ចសមុទ្រ៕
ប្រភព៖ CNA
