កាតាបដិសេធការធ្វើជាអាជ្ញាកណ្តាលរវាងអាមេរិក និងអុីរ៉ង់ តែជំរុញឱ្យបញ្ចប់សង្គ្រាមតាមផ្លូវការទូត

សន្និសីទសារព័ត៌មានប្រចាំសប្តាហ៍នៅទីក្រុងដូហា កាលពីថ្ងៃទី ២៤ ខែមីនា ឆ្នាំ២០២៦ម្សិលមិញនេះ លោកបណ្ឌិត Majed al-Ansari អ្នកនាំពាក្យក្រសួងការបរទេសកាតា បានបញ្ជាក់យ៉ាងច្បាស់ថា ប្រទេសកាតាមិនបានចូលរួមក្នុងកិច្ចខិតខំប្រឹងប្រែងសម្របសម្រួលដោយផ្ទាល់ ក្នុងនាមជាអ្នកចរចារវាងសហរដ្ឋអាមេរិក និងអុីរ៉ង់ នាពេលបច្ចុប្បន្ននោះទេ។

មិនា 25, 2026 02:53 5

កាតាបដិសេធការធ្វើជាអាជ្ញាកណ្តាលរវាងអាមេរិក និងអុីរ៉ង់ តែជំរុញឱ្យបញ្ចប់សង្គ្រាមតាមផ្លូវការទូត

ទោះបីជាគ្មានការសម្របសម្រួលផ្ទាល់ ប៉ុន្តែកាតាគាំទ្ររាល់កិច្ចខិតខំប្រឹងប្រែងផ្នែកការទូតទាំងអស់ មិនថាជាផ្លូវការ ឬមិនផ្លូវការ ដើម្បីកាត់បន្ថយភាពតានតឹង និងបញ្ចប់សង្គ្រាម។ លោកបានសង្កត់ធ្ងន់ថា៖ «រាល់ជម្លោះទាំងអស់ត្រូវតែបញ្ចប់នៅលើតុចរចា ហើយការសម្រេចបានកាន់តែឆាប់ នោះការបាត់បង់ជីវិតនឹងកាន់តែតិច»។
លោក al-Ansari បានលើកឡើងថា បច្ចុប្បន្ន កាតាកំពុងផ្តោតអារម្មណ៍ខ្លាំងលើការការពារទឹកដីរបស់ខ្លួន និងការដោះស្រាយការខូចខាតដែលបណ្តាលមកពីការវាយប្រហារជាង ២០០ លើក (ទាំងមីស៊ីល និងដ្រូន) ដែលបានកើតឡើងលើផ្ទៃប្រទេស ចាប់តាំងពីសង្គ្រាមបានផ្ទុះឡើងកាលពីចុងខែកុម្ភៈ។
អ្នកនាំពាក្យរូបនេះបានរំលឹកថា អ៊ីរ៉ង់គឺជាប្រទេសជិតខាងដែលមានវត្តមានក្នុងតំបន់តាំងពីបុរាណកាលមក ដូច្នេះមិនថាមានព្រឹត្តិការណ៍នយោបាយ ឬសង្គ្រាមអ្វីកើតឡើងនោះទេ ប្រទេសក្នុងតំបន់ទាំងអស់ត្រូវតែស្វែងរកវិធីសាស្ត្រដើម្បី «រស់នៅជាមួយគ្នាដោយសន្តិភាព»។
កាតាបានអំពាវនាវឱ្យមានការវាយតម្លៃឡើងវិញនូវ «ប្រព័ន្ធសន្តិសុខរួមក្នុងតំបន់ឈូងសមុទ្រ» បន្ទាប់ពីសង្គ្រាមនេះបញ្ចប់ទៅ ដោយសារតែវិបត្តិនេះបានបង្ហាញពីភាពចាំបាច់នៃកិច្ចសហប្រតិបត្តិការយោធា និងសន្តិសុខឱ្យកាន់តែរឹងមាំរវាងបណ្តាប្រទេស GCC។
ជារួម សេចក្តីថ្លែងការណ៍នេះធ្វើឡើងដើម្បីឆ្លើយតបនឹងការលើកឡើងរបស់ប្រធានាធិបតី Donald Trump ដែលថាមាន «វឌ្ឍនភាពនៃការចរចា» ខណៈដែលកាតាចង់បញ្ជាក់ថា ខ្លួនមិនមែនជាអ្នកនៅពីក្រោយកិច្ចពិភាក្សានោះទេ ប៉ុន្តែនៅតែបន្តបើកចំហរទ្វារការទូតជានិច្ច ដើម្បីបញ្ចៀសវិនាសកម្មកាន់តែធំនៅក្នុងតំបន់៕