កិច្ចប្រជុំកំរិតខ្ពស់លើកទី១១ ស្តីពីកិច្ចសហប្រតិបត្តិការវិស័យកម្មសិទ្ធិបញ្ញារវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) ជាមួយអង្គភាពកម្មសិទ្ធិបញ្ញានៃប្រទេសសឹង្ហបុរី (IPOS)តាមប្រព័ន្ធ Online

នៅក្នុងជំនួបតាមប្រព័ន្ធ Online នោះ ភាគីទាំងពីរបានសាទរ និងវាយតម្លៃខ្ពស់ចំពោះលទ្ធផលកិច្ចប្រជុំកំរិតមន្ត្រីបច្ចេកទេស ដែលបានរៀបចំធ្វើមុននេះបន្តិច ។ ជាពិសេស ឯកឧត្តមកិត្តិសេដ្ឋាបណ្ឌិត ក៏បានអបអរសាទរដល់លោក Daren TANG ដែលត្រូវបានបោះឆ្នោតជាប់ធ្វើជាអគ្គនាយកអង្គការកម្មសិទ្ធិបញ្ញាពិភពលោក (WIPO) ដែលនឹងចូលកាន់តំណែងនាពេលខាងមុខ និងលោកស្រី Rena LEE ប្រធានអង្គភាពកម្មសិទ្ធិបញ្ញាសឹង្ហបុរី ទើបតែងតាំងថ្មី ។ ឯកឧត្តមកិត្តិសេដ្ឋាបណ្ឌិត សង្ឃឹមយ៉ាងមុតមាំថា៖កិច្ចសហប្រតិបត្តិការលើវិស័យកម្មសិទ្ធិបញ្ញារវាងកម្ពុជា និងសឹង្ហបុរី នឹងបន្តវិវឌ្ឍន៌រីកចម្រើនទៅមុខជាលំដាប់ ។ ជាក់ស្តែង ជាការកត់សំគាល់ ក្រោមកិច្ចសហប្រតិបត្តិការរវាងក្រសួង(MITIS) និងអង្គភាពកម្មសិទ្ធិបញ្ញា ផែនការសកម្មភាពចំនួន០៥ សម្រាប់ឆ្នាំ២០១៩ ត្រូវបានអនុវត្តន៍បញ្ចប់ ។ ក្នុងនោះ ក្រសួងឧស្សាហកម្ម បានទទួលការដាក់ពាក្យស្នើសុំប្រកាសនីយបត្រតក្កកម្ម(Patent) ចាប់តាំងពីឆ្នាំ២០១៦ ដល់ខែមិថុនា ឆ្នាំ២០២០ បានចំនួនសរុប ៦២ Patent ។ យើងបានចេញវិញ្ញាបនបត្របញ្ជាក់ចំនួន ៥៤ ។ ប៉ុន្តែ កំឡុងពេលនៃវិបត្តិកូវីដ-១៩ យើងទទួលពាក្យស្នើសុំបានតែ០១ ប៉ុណ្ណោះ ពី IPOS ។ ចំណែកនៅ០៨ពាក្យស្នើសុំទៀត គឺបានអនុវត្តន៌ដូចតទៅ ៖គឺ ចំនួន០៣ ពាក្យស្នើសុំ កំពុងរង់ចាំការឆ្លើយតបពីអ្នកដាក់ពាក្យ , ចំនួន០៤ Patent ទាក់ទងនិងរបបគំហើញផ្នែកឱសថ ត្រូវបានបដិសេធ ដោយសារស្ថិតនៅក្រៅតំបន់ការពារ​ ព្រោះបានកំណត់ដោយអង្គការពាណិជ្ជកម្មពិភពលោក (WTO) និងពាក្យស្នើសុំPatent ចំនួន០១ ត្រូវបានដកចេញ ។

​បើពិនិត្យជារួម ក្រោមកិច្ចសហប្រតិបត្តិការរវាងកម្ពុជា ជាមួយអង្គភាពកម្មសិទ្ធិបញ្ញានៃប្រទេសមួយចំនួនទៀត​ រួមមាន៖ ជាមួយប្រទេស ជប៉ុន អឺរ៉ុប ចិន កូរ៉េ និងរួមទាំងប្រទេសសឹង្ហបុរីផង យើងទទួលបានការដាក់ពាក្យស្នើសុំការចុះបញ្ជីឡើងវិញនៃប្រកាសនីយបត្តតក្កកម្ម(Patent) សរុបបានចំនួន ១.១៥៨ Patent ។ ក្នុងនោះ Patent ចំនួន​២៣៦ ត្រូវបានផ្តល់ជូន​។

​ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ បានលើកទឹកចិត្តឲ្យមន្ត្រីបច្ចេកទេសទាំងពីរភាគីបន្តពិភាក្សារួមគ្នា ស្ទីពីកិច្ចសហប្រតិបត្តិការអភិវឌ្ឍន៌ និងប្រតិបត្តិការ ប្រព័ន្ធហេក (Hague System) សម្រាប់ការចុះបញ្ជីជាលក្ខណៈអន្តរជាតិទាក់ទងគំនូរឧស្សាហកម្ម និងសិទ្ធិសញ្ញា PCT សម្រាប់ប្រកាសនីយបត្រតក្កកម្មនៅកម្ពុជា រួមបញ្ជូលទាំងការបណ្តុះបណ្តាលវិស័យកម្មសិទ្ធិបញ្ញាដល់មន្ត្រីក្រសួងផងដែរ ។បន្ទាប់មកភាគីទាំងពីរក៏បានពិភាក្សាលើរបៀបវីរៈនៃកិច្ចប្រជុំសំខាន់ៗរួមមានដូចជា៖កម្មវិធីកសាងសមត្ថភាពមន្ត្រី និងការត្រៀមរៀបចំកិច្ចប្រជុំមន្ត្រីបច្ចេទេស និងកិច្ចប្រជុំកំរិតខ្ពស់លើកទី១២ នាពេលខាងមុខ ។

សូមជម្រាបថា ក្នុងរបៀបវីរៈនេះ ដៃគូសន្ទនាកំរិតខ្ពស់ បានឯកភាពថា៖កិច្ចប្រជុំកំរិតខ្ពស់លើកទី១២ ដែលគ្រោងធ្វើនៅប្រទេសសឹង្ហបុរី នៅដើមឆ្នាំ២០២១ សូមប្តូរមកធ្វើនៅកម្ពុជាវិញ ក្នុងទីក្រុងសៀមរាប តាមការស្នើសុំរបស់ភាគីកម្ពុជា ដើម្បីជាការអបអរសាទរចំពោះលោកស្រីប្រធានថ្មីរបស់ IPOS សឹង្ហបុរីផង និងការជាប់ឆ្នោតជានាយកអង្គការ WIPO របស់លោក Daren TANG ផង ក្នុងកាលៈទេសៈ​ដែលមិនមានការគំរាមកំហែងពីរោគឆ្លងកូវីដ-១៩ ៕

ប្រភព៖ ក្រសួងឧស្សាហកម្ម