ក្រសួងធនធានទឹក៖ ឥទ្ធិពលកូនព្យុះអេតូ នឹងធ្វើឲ្យកម្ពុជាមានភ្លៀងខ្យល់ ក្នុងកម្រិតពីតិចទៅច្រើន ចាប់ពីថ្ងៃទី១០-១២ ខែវិច្ឆិកាខាងមុខនេះ

(ភ្នំពេញ)៖ ក្រសួងធនធានទឹក និងឧតុនិយម នៅថ្ងៃទី០៨ ខែវិច្ឆិកា ឆ្នាំ២០២០កាលពីម្សិលមិញ បានចេញសេចក្តីជូនដំណឹង ស្តីពីស្ថានភាពធាតុអាកាសនៅកម្ពុជា។

វិថ្ឆិកា 9, 2020 02:18 1757

ក្រសួងធនធានទឹក៖ ឥទ្ធិពលកូនព្យុះអេតូ នឹងធ្វើឲ្យកម្ពុជាមានភ្លៀងខ្យល់ ក្នុងកម្រិតពីតិចទៅច្រើន ចាប់ពីថ្ងៃទី១០-១២ ខែវិច្ឆិកាខាងមុខនេះ

ក្រសួងធនធានទឹកបានបញ្ជាក់ថា យោងការតាមដាន និងការវិវត្តនៃស្ថានភាពអាកាសធាតុ បង្ហាញឲ្យឃើញថា នៅថ្ងៃទី ០៨ ខែវិច្ឆិកា ឆ្នាំ ២០២០ វិសម្ពាធ ( Tropical Depression ) បាន និងកំពុងស្ថិតនៅក្នុងសមុទ្រចិនខាងត្បូង ហើយនឹងធ្វើដំណើរឆ្ពោះមកទិសបស្ចឹម ដោយបង្កើនឥទ្ធិពលរបស់ខ្លួនទៅជា កូនព្យុះ ទី ២១ ឈ្មោះ អេតូ ( ETAU ) នៅថ្ងៃទី ១០ ខែវិច្ឆិកា ឆ្នាំ ២០២០ ។

តាមការព្យាករព្យុះនេះ នឹងថមថយឥទ្ធិពលទៅជាវិសម្ពាធ (Tropical Depression) ពេលចូលដល់លើឆ្នេរភាគខាងត្បូង ប្រទេសវៀតណាម នៅថ្ងៃទី១០ ខែវិច្ឆិកា ឆ្នាំ២០២០ ហើយបន្ទាប់មកជាសម្ពាធទាប (Low Pressure) ពេលចូលមកដល់លើភាគខាងកើតប្រទេសកម្ពុជា នៅថ្ងៃទី១១ ខែវិច្ឆិកា ឆ្នាំ២០២០។

លក្ខណៈបែបនេះ នឹងធ្វើឲ្យអាកាសធាតុនៅកម្ពុជា ចាប់ពីយប់ថ្ងៃទី ១០ ដល់ថ្ងៃទី ១២ ខែវិច្ឆិកា ឆ្នាំ ២០២០ មានស្ថានភាព ដូចខាងក្រោម ៖

* បណ្តារាជធានី ខេត្តនៅតំបន់ខ្ពង់រាប ភាគឦសាន ខេត្តភាគខាងកើតជាប់ព្រំដែនប្រទេសវៀតណាម និងខេត្តភាគខាងត្បូង នឹងអាចមានភ្លៀងខ្យល់ក្នុងកម្រិត ពីបង្គួរទៅច្រើន ។

* បណ្តាខេត្តនៅតំបន់មាត់សមុទ្រ នឹងអាចមានភ្លៀងខ្យល់ក្នុងកម្រិត ពីតិចទៅបង្គួរ និងរលកសមុទ្រមានកម្ពស់មធ្យម ។

យោងតាមស្ថានភាព ដែលបានជម្រាបខាងលើក្រសួងធនធានទឹក បានអំពាវនាវដល់បងប្អូនប្រជានេសាទ និងអ្នកធ្វើដំណើរតាមសមុទ្រទាំងអស់ សូមបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ ៕