ក្រសួងសុខាភិបាល៖ សូមចូលរួមកាត់ផ្តាច់ការចម្លងវីរុសកូវីដ១៩ ពីបុគ្គលម្នាក់ ទៅបុគ្គលម្នាក់ទៀត ឬទៅក្នុងសហគមន៍របស់ខ្លួន

ភ្នំពេញ៖ ក្រសួងសុខាភិបាលថ្ងៃទី២២ មីនា ២០២០នេះ បានអំពាវនាវសុំឲ្យប្រជាពលរដ្ឋចូលរួមកាត់ផ្តាច់ការចម្លងវីរុសកូវីដ១៩​ ពីបុគ្គលម្នាក់​ ទៅបុគ្គលម្នាក់ទៀត​ ឬទៅក្នុងសហគមន៌របស់ខ្លួន​។

លោកស្រីវេជ្ជបណ្ឌិត​ ឱ​ វណ្ណឌីន រដ្ឋលេខាធិការ​ និងជាអ្នកនាំពាក្យក្រសួងសុខាភិបាលបានមានប្រសាសន៍ស្នើសុំ ប្រជាពលរដ្ឋទាំងអស់​ ផ្តល់ទំនុកចិត្តលើក្រុមគ្រូពេទ្យ​នៅថ្នាក់ជាតិ​ និងក្រោមជាតិ​ ដែលកំពុងតែសកម្មក្នុងការស្វែងរកអ្នកប៉ះពាល់ផ្ទាល់ ឬប្រយោល​ និងសូមឲ្យមានការចូលរួមសហការស្ម័គ្រចិត្តបង្ហាញខ្លួន​ ប្រសិនបើបានដឹងថាខ្លួនធ្លាប់បានប៉ះពាល់ជាមួយអ្នកវិជ្ជមានវីរុសកូវីដ១៩​ ដើម្បីពិនិត្យសុខភាព។ លោកស្រីបានបន្ថែមថា “ប្រសិនបើអ្នកប៉ះពាល់ផ្ទាល់មិនមានបញ្ហាទេ​ អ្នកប៉ះពាល់ប្រយោលដែលរកឃើញនឹងចាត់ចែងឲ្យមានការតាមដានបន្ត​ដោយខ្លួនឯងក្នុង​រយ:ពេល ១៤​ថ្ងៃ”។

បើតាមលោកស្រីវេជ្ជបណ្ឌិតបានបញ្ជាក់ថា រហូតមកទល់ពេលនេះ​ មានអ្នកវិជ្ជមាន​វីរុសកូវីដ១៩​ សរុបចំនួន ៥៣នាក់​ ដោយក្នុងនោះអ្នកជាសះស្បើយ​ ២នាក់​ អ្នកឆ្លងផ្ទាល់បន្តមានតែ​ ៣ករណីប៉ុណ្ណោះ​ ពោលគឺកើតលើបុរសអាយុ៣៨ឆ្នាំនៅខេត្តសៀមរាប​ និងស្ត្រីជាភរិយា​ ២នាក់។ កម្ពុជាមិនទាន់មានការចម្លង​ ឬរាតត្បាតក្នុងសហគមន៌នៅឡើយទេ។

លោកស្រីកក៏បានលើកឡើងផងដែរថា នេះ​ជាចំណុចដែលប្រជាពលរដ្ឋត្រូវតែខិតខំចូលរួមការពារទប់ស្កាត់​ កុំឲ្យមានការចម្លងទៅក្នុងសហគមន៏​ ជាកិច្ចការដែលយើងទាំងអស់គ្នាត្រូវធ្វើជាចាំបាច់។

“ដូច្នេះ​ ខ្ញុំសូមអំពាវនាវហើយអំពាវនាវទៀត​ ខ្ញុំសូមលើកដៃសំពះដល់បងប្អូនជនរួមជាតិយើងទាំងអស់​ សូមលោកអ្នកមេត្តាយល់លើចំណុចនេះជាចាំបាច់នៅក្នុងកាល:ទេស:នេះ​ ហើយសូមកុំឲ្យមានការរើសអើងឲ្យសោះ។​ មិនមានអ្នកណាម្នាក់ចង់ឈឺ​ ឬចង់នាំជំងឺមកនោះឡើយ​។ តែអ្វីដែលសំខាន់​នោះ ត្រូវតែរួបរួមគ្នាកាត់ផ្តាច់ឲ្យបាន​នូវការចម្លងពីបុគ្គលដែលមានវីរុសកូវីដ១៩​ ទៅបុគ្គលផ្សេងទៀត​ ជាពិសេសអ្នកដែលនៅជិតស្និទ្ធ​ ឬក្រុមគ្រួសារ​ មិត្តភ័ក្រ្តគាត់ជាដើម។ ចូលរួមទាំងអស់គ្នា​ ការពារការចម្លងកូវីដ១៩​ ទេីបយេីងអាចមានជ័យជំនះ។ សូមជូនពរសុខភាពល្អ​ មិនមានការចម្លងវីរុសកូវីដ១៩នេះ​ ទាំងអស់គ្នា” ។ នេះជាការអំពាវនាវរបស់លោកស្រីវេជ្ជបណ្ឌិត​ ឱ​ វណ្ណឌីន រដ្ឋលេខាធិការ​ និងជាអ្នកនាំពាក្យក្រសួងសុខាភិបាល៕

ដោយ៖ ចាប មិថុនា