ស្របពេលផ្ទុះ COVID-19 តើអ្នកម្តាយគួរយកកូនទៅចាក់វ៉ាក់សាំងដែរឬទេ?

មានម៉ាក់ៗជាច្រើនបានលើកឡើងជាចម្ងល់ថា ដល់ថ្ងៃកំណត់គួរយកកូនទៅចាក់វ៉ាក់សាំងដែរឬទេ?

មិនា 19, 2020 11:00 1656

ស្របពេលផ្ទុះ COVID-19 តើអ្នកម្តាយគួរយកកូនទៅចាក់វ៉ាក់សាំងដែរឬទេ?

អ្នកម្តាយយកកូនទៅចាក់វ៉ាក់សាំង

បើមានជម្ងឺ COVID-19 កំពុងផ្ទុះ ចំពោះចម្ងល់នេះ លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និង រោគស្ត្រីនៃមន្ទីរពេទ្យបង្អែកមិត្តភាពកម្ពុជា-ចិន សែនសុខ បានអះអាងថា ត្រូវតែយកកូនទៅចាក់វ៉ាក់សាំងតាមការកំណត់។លោកវេជ្ជបណ្ឌិតបានបន្ថែមទៀតថា បើកូនដល់កំណត់ត្រូវតែមកចាក់ថ្នាំឲ្យទាន់ពេលវេលា ហើយការផ្ទុះ COVID-19 នេះមិនប៉ះពាល់ចំពោះកូនឡើយ ព្រោះពេលយកទៅចាក់ពេទ្យតែងពាក់ម៉ាស់ និងស្រោមដៃបានត្រឹមត្រូវ។

មួយវិញទៀតបើយើងខ្លាច ត្រូវតែប្រយ័ត្នដោយនៅឆ្ងាយពីអ្នកជំងឺដទៃ និងយកអ្វីបិទបាំង ឬគ្របកូនតូច ដូចជាកន្សែង ក្រមា ចំពោះអ្នកមានកូនតូចៗ អាយុ ៦ ខែចុះក្រោម។ចំពោះកូន ៦ ខែឡើងវិញ យើងអាចពាក់ម៉ាស់ ហើយក្រោយចាក់ថ្នាំរួច មកដល់ផ្ទះអាចលាងសម្អាតដៃ និងផ្លាស់ប្ដូរសម្លៀកបំពាក់ចេញ ដើម្បីឲ្យអស់ការសង្ស័យ។ ការចាក់វ៉ាក់សាំងឲ្យកូនតាមការកំណត់ ពិតជាមានសារៈសំខាន់ ព្រោះមិនកាត់បន្ថយប្រសិទ្ធភាពរបស់វ៉ាក់សាំង និងជួយទប់ស្កាត់ការឆ្លងជំងឺទាន់ពេលវេលា។

វេជ្ជបណ្ឌិតបានឲ្យដំបូន្មានថា ទោះជា COVID-19 គួរឲ្យខ្លាចមែន តែបើយើងការពារបានល្អ អត្រាឆ្លងក៏ទាបដែរ ហើយគ្រាន់តែយកកូនទៅទទួលវ៉ាក់សាំងមិនមែនជាការប្រថុយប្រថានអ្វីនោះទេ ព្រោះគ្រូពេទ្យមានអនាម័យត្រឹមត្រូវ ហើយអ្នកជំងឺផ្សេងៗក៏មិនស្ថិតនៅក្នុងបន្ទប់តែមួយជាមួយកន្លែងចាក់វ៉ាក់សាំងដែរ។

ដោយ៖ ជា បញ្ញា