សូមប្រុងប្រយ័ត្នអាល់កុលលក់នៅលើទីផ្សារ ភាគច្រើនមានមេតាណុលខ្ពស់ បង្កគ្រោះថ្នាក់ចំពោះសុខភាព

យោងតាមលទ្ធផលវិភាគរបស់មន្ទីរពិសោធន៍របស់អគ្គនាយកដ្ឋានកាំកុងត្រូលរកឃើញថា អាល់កុលដែលបាននិងកំពុងចរាចរនៅលើទីផ្សារ ភាគច្រើនមិនមែនជាប្រភេទអាល់កុលធម្មតា (អេទីលអាល់កុល) ដែលមានមុខងារប្រើប្រាស់សម្រាប់លាងសម្អាតដៃ បង្ការការចម្លងមេរោគទេ។ផ្ទុយទៅវិញអាល់កុលទាំងនោះ មានសារធាតុមេតាណុល ដែលមានបរិមាណខ្ពស់រហូតដល់ ៨០%។

មេសា 1, 2020 09:57 2056

អាល់កុល

ការលាងសម្អាតដៃដោយប្រើអាល់កុលដែលមានកម្រិតមេតាណុលបែបនេះអាចចូលទៅក្នុងស្បែក និងបង្កគ្រោះថ្នាក់ធ្ងន់ធ្ងរដល់សុខភាព។បន្ថែមពីនេះវាអាចបង្កគ្រោះថ្នាក់ដល់ស្លាប់ បើសិនជាយកទៅប្រើលាយធ្វើជាភេសជ្ជៈគ្រឿងស្រវឹងផ្សេងៗ។

នាយកដ្ឋានកាំកុងត្រូលបានបញ្ជាក់នៅក្នុងសេចក្តីជូនដំណឹងថា ក្នុងកាលៈទេសៈដែលប្រជាពលរដ្ឋកំពុងត្រូវការផលិតផលប្រើសម្រាប់លាងសម្អាតដៃដើម្បីកម្ចាត់មេរោគជាពិសេសវីរុស COVID-19 មានអាជីវករមួយចំនួនបានលួចនាំចូល និងចែកចាយផលិតផលក្លែងក្លាយជាច្រើន ដែលមិនមានស្លាកសញ្ញា និងប្រភពច្បាស់លាស់។

ដូចនេះអាជីករអ្នកលក់ និង ប្រជាពលរដ្ឋដែលប្រើប្រាស់ត្រូវដឹងនូវវិធានការមួយចំនួនដូចខាងក្រោម៖

– រាល់ការនាំចូល និងចែកចាយផលិតផលអាល់កុល សម្រាប់ប្រើប្រាស់ ត្រូវដាក់ស្លាកសញ្ញា មានបញ្ជាក់ពីប្រភព អាសយដ្ឋានអ្នកចែកចាយ ឬដាក់លក់ និងមានឈ្មោះផលិតផល ព្រមទាំងកម្រិតជាតិអាល់កុលគិតជាភាគរយនៃអេទីលអាល់កុល ឱ្យបានត្រឹមត្រូវ។

– ប្រជាពលរដ្ឋដែលជាអ្នកប្រើប្រាស់ សូមកុំទិញផលិតផលអាល់កុលដែលគ្មានស្លាកសញ្ញា និងមិនមានបញ្ជាក់ពីប្រភពច្បាស់លាស់យកមកប្រើប្រាស់សម្រាប់កម្ចាត់មេរោគ និងបង្ការការចម្លងមេរោគ COVID-19។