ក្រសួងពាណិជ្ជកម្ម រៀបចំសិក្ខាសាលាផ្សព្វផ្សាយរបាយការណ៍ថ្នាក់ជាតិ ស្តីពីកម្រិតយល់ដឹងរបស់អ្នកប្រើប្រាស់ក្នុងតំបន់អាស៊ាន នៅប្រទេសកម្ពុជា និងគម្រោងកិច្ចសហប្រតិបត្តិការរវាងអាស៊ាន និងអាល្លឺម៉ង់

ឯកឧត្តម ប៉ាន សូរស័ក្តិ បានមានប្រសាសន៍ថា កិច្ចការពារអ្នកប្រើប្រាស់ ជាប្រធានបទមួយថ្មី និងមានលក្ខណៈក្មេងខ្ចីនៅឡើយ បើធៀបជាមួយនឹងបណ្តាប្រទេសនានាក្នុងតំបន់អាស៊ាន ប៉ុន្តែរាជរដ្ឋាភិបាលកម្ពុជា បានផ្តល់ការយកចិត្តទុកដាក់ខ្ពស់ តាមរយៈការជំរុញការយល់ដឹងឱ្យបានទូលំទូលាយ បង្កើតឱ្យមានច្បាប់ស្តីពីកិច្ចការពារអ្នកប្រើប្រាស់ បង្កើតគណៈកម្មាធិការជាតិការពារអ្នកប្រើប្រាស់ បទប្បញ្ញត្តិគាំទ្រនានា និងការជំរុញសកម្មភាពកិច្ចការពារអ្នកប្រើប្រាស់ ក្នុងគោលបំណងធានាឱ្យមានកិច្ចការពារអ្នកប្រើប្រាស់ និងចូលរួមលើកកម្ពស់ការប្រកួតប្រជែងដោយសុចរិត សំដៅកំណត់វិធាន និងយន្តការក្នុងកិច្ចការពារសិទ្ធិ និងផលប្រយោជន៍របស់អ្នកប្រើប្រាស់ កសាងទំនុកចិត្តរវាងអ្នកប្រើប្រាស់ និងពាណិជ្ជករ ដើម្បីចូលរួមចំណែកបង្កើតបរិយាកាសនៃការធ្វើពាណិជ្ជកម្មដោយសុចរិត និងជាពិសេស លើកកម្ពស់ស្តង់ដារនៃការរស់នៅរបស់ប្រជាពលរដ្ឋទូទៅ ឆ្ពោះទៅរកការកាត់បន្ថយភាពក្រីក្រក្នុងព្រះរាជាណាចក្រកម្ពុជា។

ឯកឧត្តមរដ្ឋមន្ត្រី បានបញ្ជាក់ថា ក្រោមកិច្ចសហប្រតិបត្តិការយ៉ាងល្អប្រសើរ គម្រោង «ការពារអ្នកប្រើប្រាស់ក្នុងតំបន់អាស៊ាន» នេះ អគ្គនាយកដ្ឋាន ក.ប.ប. បានទទួលនូវការគាំទ្រផ្នែកបច្ចេកទេស និងហិរញ្ញវត្ថុ ដើម្បីរៀបចំការស្ទង់មតិថ្នាក់ជាតិស្តីពី «កម្រិតយល់ដឹងរបស់អ្នកប្រើប្រាស់នៅក្នុងប្រទេសកម្ពុជា»។ យោងតាមរបាយការណ៍បឋមនៃការស្ទង់មតិនេះ ពិតមែនតែគំរូសរុបចំនួន ២០០គំរូ មានលក្ខណៈតិចតួចក្នុងការតំណាងឱ្យអ្នកប្រើប្រាស់ទូទាំងព្រះរាជាណាចក្រកម្ពុជា ប៉ុន្តែត្រូវបានជ្រើសរើសចំរុះចេញពី ស្ត្រីនិងបុរស អ្នកប្រើប្រាស់នៅទីក្រុងនិងជនបទ នៅរាជធានី ខេត្ត ចំនួន៤ គឺរាជធានីភ្នំពេញ សៀមរាប បាត់ដំបង និងកំពង់ចាម ដែលគ្របដណ្តប់លើភូមិសាស្ត្រសំខាន់ៗ។ ផលិតផលចុងក្រោយរបស់ការស្ទង់មតិនេះ គឺផលិតចេញនូវរបាយការណ៍ថ្នាក់ជាតិមួយស្តីពី «កម្រិតយល់ដឹងរបស់អ្នកប្រើប្រាស់នៅក្នុងប្រទេសកម្ពុជា»។

ឯកឧត្តមរដ្ឋមន្ត្រី បានមានប្រសាសន៍បន្តថា អង្គការ GIZ បានផ្តល់នូវជំនួយបច្ចេកទេស និងហិរញ្ញវត្ថុ ដល់ប្រទេសកម្ពុជា ជាច្រើនឆ្នាំមកហើយ ដែលបង្ហាញពីការចូលរួមចំណែករបស់រដ្ឋាភិបាលអាល្លឺម៉ង់ តាមរយៈកិច្ចសហប្រតិបត្តិការរវាងអន្តររដ្ឋាភិបាលអាល្លឺម៉ង់ និងកម្ពុជា ដើម្បីធ្វើឱ្យប្រសើរឡើងកិច្ចការអភិវឌ្ឍក្នុងវិស័យជាអាទិភាពស្របតាមគោលនយោបាយរបស់រាជរដ្ឋាភិបាលកម្ពុជា ក្រោមការគាំទ្រក្នុងគម្រោងថ្មីនេះគឺគម្រោង «ការពារអ្នកប្រើប្រាស់ក្នុងតំបន់អាស៊ាន» ដើម្បីកិច្ចសហប្រតិបត្តិការសេដ្ឋកិច្ច និងការអភិវឌ្ឍអាល្លឺម៉ង់ អនុវត្តដោយអង្គការ GIZ មានរយៈពេល ៣ឆ្នាំ ដែលបន្តរហូតដល់ឆ្នាំ២០២២ មានគោលបំណងសំខាន់ គឺដើម្បីពង្រឹងប្រព័ន្ធកិច្ចការពារអ្នកប្រើប្រាស់ក្នុងតំបន់អាស៊ាន ហើយផ្តល់ការគាំទ្រដល់ប្រទេសជាសមាជិកអាស៊ាន។ ឯកឧត្តមរដ្ឋមន្ត្រី ក៏បានគាំទ្រ និងណែនាំឱ្យអង្គភាពក្រោមឱវាទក្រសួងពាណិជ្ជកម្ម ជាពិសេសអគ្គនាយកដ្ឋាន ក.ប.ប. បន្តពង្រឹងកិច្ចសហប្រតិបត្តិការល្អជាមួយនឹងអង្គការ GIZ ដែលជាដៃគូអភិវឌ្ឍយូរឆ្នាំ និងស្មោះត្រង់ ដើម្បីអនុវត្តគម្រោងនេះ ឱ្យទទួលបានប្រសិទ្ធភាពខ្ពស់។

ជាមួយគ្នានេះ ឯកឧត្តមរដ្ឋមន្ត្រី សូមគាំទ្រការប្រើប្រាស់របាយការណ៍នេះ ជាឯកសារមូលដ្ឋានក្នុងកិច្ចការពារអ្នកប្រើប្រាស់,  ជំនួយស្មារតីក្នុងការឆ្លុះបញ្ចាំង និងការលើកកម្ពស់ចំណេះដឹងសាធារណៈ និងសម្រាប់រៀបចំផែនការឆ្លើយតបនឹងកិច្ចការពារអ្នកប្រើប្រាស់នៅកម្ពុជា។ ឯកឧត្តមរដ្ឋមន្ត្រី ក៏បានបង្ហាញក្តីសង្ឃឹម និងជឿជាក់ នឹងចូលរួមយ៉ាងសកម្មនូវកិច្ចពិភាក្សា និងផ្តល់ធាតុចូលបន្ថែមឱ្យបានគ្រប់ជ្រុងជ្រោយ ដើម្បីដាក់ចេញនូវវិធានការណ៍អនុវត្តបន្ត ក្នុងគោលបំណងធ្វើឱ្យប្រសើរឡើងនូវចំណេះដឹង ជំនាញ សមត្ថភាព អាកប្បកិរិយា និងទំនុកចិត្តរបស់អ្នកប្រើប្រាស់នៅក្នុងព្រះរាជាណាចក្រកម្ពុជា៕

ប្រភព: ក្រសួងពាណិជ្ជកម្ម