ដូណាល់ ត្រាំ ចាកចេញពីមន្ទីរពេទ្យវិញទាំងមានអារម្មណ៍ល្អ ហើយថែមទាំងប្រាប់ថា កុំខ្លាចកូវីដ១៩ ទៀតផង

វ៉ាស៊ីនតោន៖ ប្រធានាធិបតីអាមេរិកលោក ដូណាល់ ត្រាំ បានចាកចេញពីមន្ទីរពេទ្យ ដែលលោកបាន សម្រាកព្យាបាលវីរុសកូវីដ១៩ និងជិះឧទ្ធម្ភាគចក្រមួយគ្រឿងត្រឡប់ទៅសេតវិមានវិញ។

តុលា 6, 2020 04:49 566

ដូណាល់ ត្រាំ ចាកចេញពីមន្ទីរពេទ្យវិញទាំងមានអារម្មណ៍ល្អ ហើយថែមទាំងប្រាប់ថា កុំខ្លាចកូវីដ១៩ ទៀតផង

ខណៈពេលចេញពីមជ្ឈមណ្ឌលវេជ្ជសាស្ត្រ វ៉ាល់ធើ រីត (Walter Reed) លោកត្រាំលើកមេដៃឡើងលើ នៅខាងក្រៅសេតវិមានដោយបញ្ជាក់ថា លោកមានអារម្មណ៍ល្អ យ៉ាងណាមិញលោកមិនបានឆ្លើយតបនឹងសំណួរ របស់ក្រុមសារព័ត៌មានឡើយទេ ដែលសួរថា តើមានមនុស្សប៉ុន្មាននាក់ដែលឆ្លងវីរុសក្នុងសេតវិមាននោះ ប៉ុន្តែលោកបាននិយាយមួយម៉ាត់ថា សូមអរគុណច្រើនដល់អ្នកទាំងអស់គ្នា។

មិនតែប៉ុណ្ណោះ លោកបានបង្ហោះសារខ្លីមួយតាមរយៈបណ្តាញសង្គមធ្វីតធើ (Twitter) ថា "យុទ្ធនាការបោះឆ្នោតនឹងចាប់ផ្តើមឡើងវិញក្នុងពេលឆាប់នេះៗ"។ ត្រាំបន្ថែមថា "ឥឡូវនេះ ខ្ញុំមានអារម្មណ៍ល្អខ្លាំងណាស់ ល្អជាង២០ឆ្នាំមុនទៅទៀត កុំខ្លាចកូវីដ១៩ និងកុំឲ្យវាគ្រប់គ្រងលើជីវិតអ្នកបាន នៅក្រោមរដ្ឋបាលរបស់ត្រាំ យើងបានអភិវឌ្ឍចំណេះដឹង និងថ្នាំព្យាបាលដ៏ខ្លាំងពូកែទៀតផង"។

សូមជម្រាបថា ប្រធានាធិបតីដូណាល់ ត្រាំ និងភរិយារបស់លោក បានឆ្លងវីរុសកូវីដ១៩កាលពីសប្តាហ៍មុនត្រឹមតែជាង៤សប្តាហ៍ប៉ុណ្ណោះមុនពេលបោះឆ្នោតប្រធានាធិបតីអាមេរិក នៅថ្ងៃទី០៣ ខែវិច្ឆិកាខាងមុខ៕