[វីដេអូ] Ep.161 ប្រធានបទ៖ ការអស់រដូវ

ការអស់រដូវមានន័យថាស្ត្រីមិនមានការមករដូវរយៈពេល១ឆ្នាំពេញ។ មនុស្សស្រីគឺមានក្រពេញមេជីវិតញីសម្រាប់បញ្ចេញមេជីវិតញីរៀងរាល់១ខែម្តង ក្នុងនោះដែរនៅពេលដែលស្ត្រីដល់វ័យលូតលាស់មួយក្នុងចន្លោះពី ៤៨ឆ្នាំរហូតដល់៥៥ឆ្នាំ ជាវ័យដែលស្រ្តីអាចអស់រដូវដែលជាច្បាប់ធម្មជាតិ។ ផ្ទុយទៅវិញសម្រាប់ស្ត្រីដែលអស់រដូវលឿនមុនអាយុ៤៥ឆ្នាំអាចប្រឈមនឹងជំងឺផ្សេងៗ។

តុលា 18, 2023 03:38 654

រោគសញ្ញានៃការអស់រដូវ ៖

ចំពោះស្ត្រី ១ទៅ២ឆ្នាំមិនមករដូវ៖

ក្តៅបាតដៃ បាតជើង
ក្តៅមុខ ក្តៅមាត់
ស្បែកស្ងួត
អារម្មណ៍ប្រែប្រួល
រដូវប្រែប្រួលអាច ២ទៅ៣ខែឬ៦ខែ ទើបមកម្តង

ចំពោះស្ត្រីមិនមករដូវ ១ឆ្នាំពេញ៖

ក្តៅបាតដៃ បាតជើង មុខ មាត់
ស្ងួតស្បែក
បែកញើសស្អិតនៅពេលយប់
អារម្មណ៍ប្រែប្រួលឆាប់ឆេវឆាវ
ញ័រទ្រូង
ស្ងួតទ្វារមាស
ចុករោយដៃជើង

ចំពោះស្ត្រីមិនមករដូវលើសពី១ឆ្នាំពេញអាចនឹងមានរោគសញ្ញាបន្ថែមពីដំណាក់កាលខាងលើ៖

ចុកដៃជើង
ងាយពុកឆ្អឹង
លើសឈាម ។

កត្តាប្រឈមនៃការអស់រដូវ៖

ឆាប់មករដូវលឿនពេកក៏អាចប្រឈមនឹងការអស់រដូវលឿនដូចគ្នា។

ប្រឈមនូវកង្វះអ័រម៉ូន Estrogen ដែលមានតួនាទីក្នុងការជួយសម្រួលដល់ការចាប់យកកាល់ស្យូមនៃឆ្អឹងឲ្យមានភាពរឹងម៉ាំប្រសិនបើឆាប់អស់អ័រម៉ូន Estrogen គឺងាយនឹងពុកឆ្អឹង លើសឈាម ស្ទះសរសៃឈាមបេះដូងស្ងួតទ្វារមាស(ក្តៅក្រហាយ រមាស់ រលាក) ឈឺក្បាល វិលមុខ ញ័រដើមទ្រូង បែកញើសស្អិត ហត់ថប់ មួរម៉ៅ។ល។
កើតជំងឺមហារីក ចាក់ថ្នាំគីមី បាញ់កាំរស្មី ដែលប៉ះពាល់ទៅលើក្រពេញមេជីវិតញី
ដុំគីសនៅដៃស្បូន ជំងឺស្បូន ដែលតម្រូវឲ្យយកក្រពេញមេជីវិតញីចេញមុនពេល
ជំងឺធ្លាក់ស ដែលធ្វើឲ្យមានមេរោគតោងយូរៗ ធ្វើឲ្យក្រិនក្រពេញមេជីវិតញី
ប្រើប្រាស់ថ្នាំភ្ញោចពងមេជីវិតដែលធ្វើឲ្យមានពងមេជីវិតច្រើន
កង្វះអាហាររូបត្ថម្ភ និងសារធាតុចិញ្ចឹម ។

សម្រាប់ស្ត្រីអស់រដូវគួរបរិភោគអាហារទាំងនេះរួមមាន៖

អាហារដែលមានជាតិវិតាមីន E
បន្លែ ផ្លែឈើ ដែលសម្បូរជាតិប្រេង (ប្រេងអូលីវ, គ្រាប់ស្វាយចន្ទី, គ្រាប់កៅឡាក់, ផ្លែប័រ...)
ទឹកសណ្តែកស
ទឹកដោះគោឆៅ ឬទឹកដោះគោដែលមាន High Calcium

វិធីសាស្ត្រដែលស្ត្រីអស់រដូវគួរជៀសវាង៖

មិនគួរពិសាថ្នាំដែលមិនមានការប្រឹក្សាជាមួយគ្រូពេទ្យ
មិនគួរប្រើប្រាស់ទឹកអនាម័យជៀសវាងទ្វារមាសស្ងួត
ជៀសវាងការធ្វើការងារធ្ងន់ ព្រោះស្ត្រីអស់រដូវងាយពុកឆ្អឹង
ជួបប្រឹក្សាជាមួយវេជ្ជបណ្ឌិត១ឆ្នាំម្តង
ហាមប្រើប្រាស់សារជាតិធ្វើឲ្យស្បែកសដែលមានសារជាតិ retinol ឬ hyaluronic acid (ឡេ, ថ្នាំ...)
ហាមប្រើប្រាស់ថ្នាំឬជែលលាបដើម្បីឲ្យមានសំណើមនៅទ្វារមាស និងស្បែកដោយមិនបានព្រឹក្សាជាមួយវេជ្ជបណ្ឌិត ។

ជាចុងក្រោយ ស្ត្រីគួរថែទាំខ្លួនប្រាណឲ្យបានល្អប្រសិនបើដឹងថាខ្លួនជិតអស់រដូវគួរប្រឹក្សាជាមួយវេជ្ជបណ្ឌិតដែលមានជំនាញច្បាស់លាស់ដើម្បីទទួលបានការណែនាំ និងព្យាបាលបានត្រឹមត្រូវ។ ស្ត្រីគួរហាត់ប្រាណ ជ្រើសរើសរបបចំណីអាហារឲ្យបានល្អ គេងឲ្យបានគ្រប់គ្រាន់ ព្យាយាមធ្វើសកម្មភាពជាប្រចាំ និងឆែកសុខភាពស្ត្រីរៀងរាល់ ១ឆ្នាំម្តង៕