ក្រុមប្រតិភូកីឡាករពិការកម្ពុជា បង្ហាញវត្តមានកិត្តិយសជាតិក្នុងពិធីបើក ប៉ារ៉ាឡាំពិក ទីក្រុងតូក្យូ ប្រទេសជប៉ុន

នៅលើរទេះរបស់កីឡាករជម្រើសជាតិពិការកម្ពុជា វ៉ាន វ៉ុន មានដងទងជាតិកម្ពុជា និងនៅលើដៃរបស់នាយបេសកកម្ម លោក យី សុភ័ក្ត្រា ក៏បានកាន់ទង់ជាតិក្រវីបក់ជាមួយនឹងក្តីរីករាយ ក្នុងការបង្ហាញពីការចូលរួមរបស់វិស័យកីឡាជនពិការព្រះរាជាណាចក្រកម្ពុជា នៅក្នុងចំណោមប្រទេសនានាលើពិភពលោក និងម្ចាស់ផ្ទះជប៉ុន។ ក្រុមប្រតិភូ និងកីឡាករដែលមានពីររូបក្នុងព្រឹត្តិការណ៍នេះ ទទួលបានការឧបត្ថម្ភទាំងស្រុងពីប្រមុខរាជរដ្ឋាភិបាលលកម្ពុជា សម្តេចតេជោ ហ៊ុន សែន ដែលជាប្រធានគណៈកម្មាធិការជាតិប៉ារ៉ាឡាំពិកកម្ពុជា។

ជាមួយគ្នានោះ ឯកឧត្តម  អ៊ឹង រចនា ឯកអគ្គរាជទូតកម្ពុជាប្រចាំប្រទេសជប៉ុនបានលើកឡើងនៅលើផេកផ្លូវការរបស់ខ្លួនថា «វ៉ាន វ៉ុន ជាកីឡាករប្រណាំងរទេះ (កម្រិតពិការភាព T-54) ហើយខ្ញុំរីករាយ ដែលបានឃើញអត្តពលិក ដែលមានទំនាក់ទំនងជាមួយជប៉ុននឹងធ្វើជាតំណាងឱ្យប្រទេសកម្ពុជា នៅក្នុងការប្រកួតកីឡាប៉ារ៉ាឡាំពិក ទីក្រុងតូក្យូ២០២០។ ខ្ញុំសូមជូនពរឱ្យគាត់សម្រេចបានជោគជ័យ ហើយខ្ញុំក៏សង្ឃឹមថា គាត់នឹងផ្តល់ការលើកទឹកចិត្ត និងក្តីសង្ឃឹមដល់ប្រជាជនទាំងអស់ នៅក្នុងប្រទេសជប៉ុន និងប្រទេសកម្ពុជា ក៏ដូចជាប្រជាជនទូទាំងពិភពលោកផងដែរ»។ ឯកឧត្តមជឿជាក់ថា «យើងមិនត្រឹមតែរំភើបចិត្តដោយការប្រកួតប្រជែងប៉ុណ្ណោះទេ ប៉ុន្តែយើងក៏បានរៀនសូត្រជាច្រើន ដូចជា ភាពសម្បូរបែបនៃគុណតម្លៃនៅក្នុងសង្គមរបស់យើង និងសារៈសំខាន់នៃការបន្តការព្យាយាមជាដើមផងដែរ»។ ការប្រកួតប៉ារ៉ាឡាំពិករដូវក្តៅ គឺជាការប្រកួតប្រជែងលំដាប់ថ្នាក់ពិភពលោករបស់អត្តពលិកជនពិការ។ វាត្រូវបានគេប្រារព្ធធ្វើរៀងរាល់៤ឆ្នាំម្តង នៅទីក្រុងដដែល ដូចនឹងកីឡាអូឡាំពិកដែរ។

ឯកឧត្តម យី វាសនា អគ្គលេខាធិការ គណៈកម្មាធិការជាតិប៉ារ៉ាឡាំពិកកម្ពុជាមានប្រសាសន៍ដែរថា បើទោះបីជាកីឡាជនពិការកម្ពុជាត្រូវបានបញ្ជូនកីឡាករតែម្នាក់ចូលរួមប្រកួត ក្រោមការដឹកនាំដោយនាយបេសកកម្មម្នាក់ លោក យី សុភ័ក្ត្រា ក៏នេះគឺជាការបង្ហាញនូវការខិតខំប្រឹងប្រែង ដើម្បីចូលរួមគាំទ្រដល់ម្ចាស់ផ្ទះជប៉ុនរបស់កម្ពុជា និងបង្ហាញពីការចូលរួមកសាងមិត្តភាព សាមគ្គីភាពជាមួយបណ្តាប្រទេសនានា នៅក្នុងការប្រកួតដ៏ធំនេះផងដែរ។

សូមបញ្ជាក់ថា កីឡាករពិការ វ៉ាន វ៉ុន ត្រូវប្រកួតលើវិញ្ញាសាប្រណាំងរទេះ (កម្រិតពិការភាព T-54) នាវេលាម៉ោង១១:៤៣នាទីថ្ងៃទី០១ ខែកញ្ញា ឆ្នាំ២០២១។ ពិធីបិទជាផ្លូវការ ព្រឹត្តិ ការណ៍ប៉ារ៉ាឡាំពិកនេះ គ្រោងនឹងបិទបញ្ចប់នាថ្ងៃទី០៥ ខែកញ្ញា ឆ្នាំ២០២១៕

ប្រភព: ក្រសួងព័ត៌មាន