ពលរដ្ឋភៀសសឹកបានកើនដល់ជាង៣ម៉ឺនគ្រួសារស្មើនឹងជាង១២ម៉ឺននាក់ នៅក្នុងខេត្តឧត្តរមានជ័យ និងខេត្តបន្ទាយមានជ័យ

ឯកឧត្តម​កិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់​គ្រង​គ្រោះមហន្តរាយបាន​អញ្ជើញចុះពិនិត្យស្ថានភាព​ប្រជា​ពលរដ្ឋភៀសសឹក​តាមមណ្ឌលសុវត្ថិភាពនានានៅក្នុងខេត្តឧត្តរមានជ័យ និងខេត្តបន្ទាយ​មានជ័យ។

នៅខេត្តឧត្តរមានជ័យឯកឧត្តម គន់ គីម បានអញ្ជើញពិនិត្យមណ្ឌល​សុវត្ថិភាព​ចំនួនពីរកន្លែងផ្សេងគ្នា ក្នុងស្រុកចុងកាល់ ដែលជម្លៀសមក​ពីតាមព្រំដែន។ទីតាំងទីមួយ ស្ថិតនៅវត្តបាត់ថ្កូវ ឃុំចុងកាល់ និងទីតាំង​ទីពីរ ដែលជាទីតាំង​មួយក្នុង​ចំណោមទីតាំងជាច្រើនផ្សេងទៀតក្នុងស្រុក​ចុងកាល់ ។នៅទីនោះឯកឧត្តមទេសរដ្ឋមន្រ្តីសង្កេតឃើញថា អាជ្ញាធរ​ខេត្ត ស្រុក និងមូលដ្ឋានបានកំណត់ទីតាំងមណ្ឌលសុវត្ថិភាពដែលមាន​សុវត្ថិភាពខ្ពស់ដល់ជន​ភៀសសឹកបានស្នាក់នៅបណ្តោះ​អាសន្ន។ឯកឧត្តមក៏បានពិនិត្យមណ្ឌលសុវត្ថិភាពនៅក្នុងស្រុកអន្លង់វែងផងដែរ។

ឯកឧត្តមទេសរដ្ឋមន្រ្តី ណែនាំដល់អាជ្ញាធរត្រូវតាមដានឱ្យបានម៉ត់ចត់​រាល់តម្រូវការចាំបាច់ដូចជា ស្បៀង សម្ភារៈប្រើ​ប្រាស់ ឬថ្នាំសង្កូវឱ្យបាន​គ្រប់គ្រាន់សម្រាប់ចែកជូនប្រជាពលរដ្ឋ ហើយក្នុងករណីមានការខ្វះ​ខាត​ត្រូវស្នើទៅកាន់រដ្ឋបាល​ខេត្ត ឬមន្ទីរជំនាញ ដើម្បីចាត់ចែងភ្លាមជូន​ប្រជាពលរដ្ឋ។

គួរបញ្ជាក់ថា ចំនួនជនភៀសសឹកគិតត្រឹមម៉ោង១២ថ្ងៃត្រង់ថ្ងៃទី១០​ ខែធ្នូ ឆ្នាំ២០២៥​ចំនួនជនភៀសសឹកបាន​កើនដល់​ជាង ៣៦.០០០គ្រួសារ ស្មើនឹងមនុស្សជាង ១២ម៉ឺននាក់។ក្នុងនោះ៖ខេត្តព្រះវិហារ មានជនភៀស​សឹកកើនដល់​៦.១៣៣​គ្រួសារ ស្មើនឹងមនុស្សចំនួន​២១.៦៣៩នាក់,ខេត្តឧត្តរមានជ័យមានជនភៀសសឹកកើនដល់ ៩.៧៦៨គ្រួសារ ស្មើនឹង​មនុស្ស​ចំនួន៣៣.៧៨៧នាក់,​ខេត្តបន្ទាយ​មានជ័យ មានជនភៀសសឹកកើនដល់១០.២៥៥គ្រួសារ ស្មើនឹងមនុស្ស​៣៦.២៤៤នាក់,ខេត្តបាត់ដំបងមានជនភៀសសឹក២០២គ្រួសារ ស្មើនឹងមនុស្ស៨១០នាក់,ខេត្តពោធិ៍សាត់ មានជន​ភៀសសឹកកើន​ដល់៦៤១គ្រួសារ ស្មើនឹងមនុស្ស១.៨៩៦នាក់ ដោយភាគច្រើនបាន​ជម្លៀសពីព្រំដែនថ្មដា មកកាន់ទីរួម​ស្រុកវាលវែង,ខេត្តសៀមរាបបាន​ទទួល​ជនភៀសសឹកកើនដល់៩.៩៥៨គ្រួសារ ស្មើនឹងមនុស្សចំនួន ៣១.៨៣៧នាក់៕

ប្រភព៖ ក្រសួងព័ត៌មាន - Ministry of Information