៧ ចំនុចដែលអ្នកគួរតែដឹងនៅពេលណាញ៉ាំទឹកល្អបំផុត

ការញ៉ាំទឹកគឺជារឿងសំខាន់បំផុតដើម្បីបង្គ្រប់ជាតិទឹកនៅក្នុងខ្លួន តើពេលណាដែលជាពេលវេលាដ៏ល្អបំផុតដើម្បីញ៉ាំទឹក? ពិតណាស់មនុស្សយើងភាគច្រើននឹងញ៉ាំទឹកនៅពេលដែលមានអារម្មណ៍ថាស្រេកជាក់ជាមិនខានឡើយ។

មិនា 9, 2020 07:08 2243

៧ ចំនុចដែលអ្នកគួរតែដឹងនៅពេលណាញ៉ាំទឹកល្អបំផុត

ការញ៉ាំទឹក

វាពិតជាមិនអីទេចំពោះរឿងនេះ ប៉ុន្តែដើម្បីបានលទ្ធផលល្អបំផុត ដូចនេះយើងសូមបង្ហាញនៅពេលវេលាដែលអ្នកគួរតែញ៉ាំទឹកដូចជា ៖

+ញ៉ាំទឹកពេលភ្ញាក់ពីគេង នៅក្នុងរាងកាយមនុស្សយើង គឺត្រូវការទឹកជាចាំបាច់ដើម្បីធ្វើការជាពិសេសក្រោយពេលដែលរាងកាយសម្រាករយៈពេលយូរ។ អ្នកគួរតែធ្វើបែបនេះនៅពេលភ្ញាក់ពីគេងព្រឹកឡើង។ បើសិនជាអ្នកអាចធ្វើវាបាន នោះរាងកាយនឹងធ្វើការបានកាន់តែស្រួលសម្រាប់ការរស់នៅពេញមួយថ្ងៃ។

+ញ៉ាំទឹកពីរបីនាទីមុនពេលចូលគេង ការធ្វើបែបនេះនឹងជួយជំនួសជាតិទឹកដែលបាត់បង់ក្នុងពេលគេងលក់ផងដែរ ។

+ញ៉ាំទឹក៣០នាទីមុនបាយ អ្នកជំនាញខាងសម្រកទម្ងន់នឹងប្រាប់អ្នកថា អ្នកអាចប្រើវិធីនេះដើម្បីការពារកុំឲ្យញ៉ាំអាហារច្រើនៗពេក ដោយសារតែពេលដែលអ្នកញ៉ាំទឹកខ្លះមុនបាយ អ្នកនឹងមានអារម្មណ៍ថាញ៉ាំតិចៗឆាប់ឆ្អែត។រឿងនេះមិនត្រឹមតែជួយដល់ការសម្រកទម្ងន់ទេ តែក៏នឹងជំរុញដល់មុខងារកាន់តែល្អដល់កោសិការផងដែរ ជាពិសេសការរំលាយអាហារតែម្តង។

+ញ៉ាំទឹកពេលអស់កម្លាំង តើអ្នកមានអារម្មណ៍ថា ពេលខ្លះអស់កម្លាំងខ្លាំងដែរឬទេ ?ជាពិសេសនៅពេលរសៀលតែម្តង បើសិនជាការអស់កម្លាំងបង្កឡើងដោយការខ្សោះជាតិទឹក យកល្អគួរតែញ៉ាំទឹកមួយកែវ ហើយអ្នកនឹងមានអារម្មណ៍ល្អជាងមុន។

+ញ៉ាំទឹកមុនហាត់ប្រាណ យោងទៅតាមសីតុណ្ហភាព និងបរិយាកាស និងកម្រិតនៃជាតិទឹកក្នុងខ្លួនអ្នកប្រហែលជាត្រូវការញ៉ាំទឹក ៦ ទៅ ៨ កែវក្នុងមួយថ្ងៃដើម្បីការពារកុំឲ្យខ្សោះជាតិទឹកក្រោយពីហាត់ប្រាណរួច។ ការបង្គ្រប់ជាតិទឹកក្នុងខ្លួនគឺជារឿងសំខាន់ក្នុងការការពារខ្លួនពីសីតុណ្ហភាពក្តៅ ហើយក៏ជួយជំរុញដល់របត់ឈាមរត់កាន់តែស្រួលដល់រាងកាយទាំងមូលដែរ។

+ញ៉ាំទឹកក្រោយហាត់ប្រាណរួច ក្រោយពីហាត់ប្រាណរួចអ្នកប្រហែលជាត្រូវញ៉ាំទឹកច្រើនដើម្បីជំនួសជាតិទឹកដែលបាត់បង់តាមរយៈការនោម ឬបែកញើសជាដើម។ ចំនួនទឹកដែលអ្នកត្រូវការគឺអាស្រ័យទៅតាមសុខភាព ទម្ងន់ និងការហាត់ប្រាណក្រោមស្ថានភាពក្តៅខ្លាំងឬអត់ រយៈពេលហាត់ និងកត្តាផ្សេងៗទៀត។ ចូរប្រាកដថា មិនត្រូវញ៉ាំទឹកច្រើនពេក និងលឿនពេកទេ ព្រោះវាអាចធ្វើឲ្យឈឺក្រពះបាន។

+ញ៉ាំទឹកពេលអ្នកឈឺ អាការ:មានដូចជា រាករូស ក្អួត ជាដើម។ វាធ្វើឲ្យជាតិទឹកនៅក្នុងខ្លួនត្រូវបាត់បង់ ដូច្នេះអ្វីដែលសំខាន់គឺត្រូវបង្គ្រប់ជាតិទឹកក្នុងខ្លួនដោយញ៉ាំទឹកអោយបានគ្រប់គ្រាន់៕