រដ្ឋមន្ត្រីក្រសួងហិរញ្ញវត្ថុអាល្លឺម៉ង់ធ្វើអត្តឃាតខ្លួនឯងខណៈវីរុសកូវីដ១៩ជះឥទ្ធិពលដល់សេដ្ឋកិច្ច

បរទេស៖ លោក Thomas Schäfer រដ្ឋមន្រ្តីក្រសួងហិរញ្ញវត្ថុនៃរដ្ឋ Hesse ប្រទេសអាល្លឺម៉ង់ ដែលរួមបញ្ចូលទីក្រុង Frankfurt ផងនោះ ត្រូវបានគេប្រទះឃើញស្លាប់នៅក្បែរផ្លូវដែក។ នេះបើតាមសារព័ត៌មាន Aljazeera ចុះផ្សាយថ្ងៃទី២៩ មីនា ២០២០។

លោក Volker Bouffier បានឲ្យដឹងកាលពីថ្ងៃអាទិត្យថាលោក Thomas Schäfer រដ្ឋមន្រ្តីក្រសួងហិរញ្ញវត្ថុនៃរដ្ឋ Hesse ប្រទេសអាល្លឺម៉ង់ បានធ្វើអត្តឃាតខ្លួនឯងបន្ទាប់ពីមានការព្រួយបារម្ភយ៉ាងខ្លាំងក្នុងការធ្វើយ៉ាងណាទប់ទល់នឹងការធ្លាក់ចុះនៃសេដ្ឋកិច្ច។

លោក Schäfer អាយុ ៥៤ ឆ្នាំត្រូវបានគេប្រទះឃើញស្លាប់នៅក្បែរផ្លូវដែកកាលពីថ្ងៃសៅរ៍ទី២៨ មីនា ២០២០។ ការិយាល័យរដ្ឋអាជ្ញា The Wiesbaden បាននិយាយថា ពួកគេជឿថាគាត់ស្លាប់ដោយសារការធ្វើអត្តឃាត។

លោក Bouffier បានសរសេរក្នុងសេចក្តីថ្លែងការណ៍មួយថា “យើងតក់ស្លុតយ៉ាងខ្លាំង វាមិនគួរឱ្យជឿឡើយ ហើយរឹតតែសំខាន់បំផុតនោះគឺថា យើងមានទុក្ខក្រៀមក្រំជាពន់ពេក។

ប៉ូលីស និងព្រះរាជអាជ្ញាបាននិយាយថាកត្តានានា រួមទាំងការសាកសួរសាក្សី និងការសង្កេតផ្ទាល់របស់ពួកគេនៅនឹងកន្លែងកើតហេតុបាននាំឱ្យពួកគេសន្និដ្ឋានថា លោក Schäfer ពិតជាបានសម្លាប់ខ្លួនមែន។

Hesse គឺជាចំណុចស្នូលរបស់រដ្ឋធានីហិរញ្ញវត្ថុ Frankfurt ដែលមានស្នាក់ការកណ្តាលស្ថាប័នផ្តល់ប្រាក់កម្ចីធំៗ ដូចជា ធនាគារ Deutsche Bank និង Commerzbank ជាដើម។ ធនាគារកណ្តាលអឺរ៉ុបក៏មានទីតាំងនៅ Frankfurt ផងដែរ។

លោក Bouffier បានលើកឡើងថា លោក Schaefer ដែលបានកាន់តំណែងជារដ្ឋមន្រ្តីក្រសួងហិរញ្ញវត្ថុរបស់រដ្ឋ Hesse អស់រយៈពេល ១០ ឆ្នាំមកហើយ បានប្រឹងប្រែងធ្វើការ "ទាំងយប់ទាំងថ្ងៃ" ដើម្បីជួយក្រុមហ៊ុន និងកម្មករដោះស្រាយផលប៉ះពាល់ផ្នែកសេដ្ឋកិច្ចពីការរាតត្បាតនៃវីរុសកូរ៉ូណា។

លោក Bouffier ដែលជាសម្ព័ន្ធមិត្តជិតស្និទ្ធរបស់អធិការបតី Angela Merkel បាននិយាយថា“ ថ្ងៃនេះយើងអាចសន្មតបានថា គាត់ពិតជាមានការព្រួយបារម្ភយ៉ាងខ្លាំង”។

លោកបានបន្ថែមថា “វាច្បាស់ណាស់ក្នុងអំឡុងពេលដ៏លំបាកនេះដែលយើងត្រូវការមនុស្សដូចគាត់”។

លោក Schäfer បានបន្សល់ទុកប្រពន្ធ និងកូនពីរនាក់ឲ្យនៅកំព្រា។

សូមបញ្ជាក់ផងដែរថា គិតត្រឹមថ្ងៃទី៣០ មីនា ២០២០នេះ ប្រទេសអាល្លឺម៉ង់មានអ្នកឆ្លងវីរុសកូវីដ១៩ ចំនួន 62,435 ហើយ ខណៈអ្នកស្លាប់មានចំនួន 541នាក់ និងអ្នកជាសះស្បើយមានចំនួន 9,211 នាក់៕

ប្រភព៖ Aljazeera ប្រែសម្រួល៖ ចាប មិថុនា