ឧកញ៉ា ប៉ិច បូឡែន៖ យុវជនគួរចាប់យកជំនាញបច្ចេកទេស និងវិជ្ជាជីវៈ ដើម្បីទ្រទ្រង់ជីវភាពគ្រួសារសិន បើពុំទាន់មានលទ្ធភាពបន្តការសិក្សានៅសាកលវិទ្យាល័យ

ឧកញ៉ា បានបន្តទៀតថា យុវជនត្រូវចេះថ្លឹងថ្លែងមើលកម្រិតជីវភាពរបស់ក្រុមគ្រួសាររបស់ខ្លួនថា តើអាចផ្គត់ផ្គង់ថវិកាសម្រាប់ការបន្តការសិក្សានៅសាកលវិទ្យាល័យបានដែរឬទេ? ដោយសារការចំណាយពេលរហូតដល់៤ឆ្នាំទើបបញ្ចប់ រីឯថវិកាសម្រាប់ការចាយវាយប្រចាំថ្ងៃ និងថ្លៃសិក្សា ចំណាយច្រើនគួរសមផងដែរ។

អគ្គនាយកខាងលើ បានបន្ថែមទៀតថា ការសិក្សាជំនាញបច្ចេកទេសនិងវិជ្ជាជីវៈ ចំណាយថវិកាតិច ហើយរយៈពេលអាចពី៣ខែ ទៅ៦ខែ តាមមុខជំនាញនីមួយៗ ងាយស្រួលក្នុងការស្វែងរកការងារធ្វើ និងទទួលបានប្រាក់ខែសមរម្យ ដោយសារប្រទេសយើងជាប្រទេស កំពុងអភិវឌ្ឍ ដូចនេះត្រូវការអ្នកជំនាញបច្ចេកទេស និងវិជ្ជាជីវៈច្រើន សម្រាប់មប្រើការងារក្នុងវិស័យសំណង់ ទេសចរណ៍ កសិកម្ម សិប្បកម្ម ឧស្សាហកម្មជាដើម។ លើសពីនេះការសិក្សា ជំនាញបច្ចេកទេសនឹងផ្តល់មកវិញនូវផលប្រឡប់សងផ្នែកសេដ្ឋកិច្ចបានឆាប់រហ័ស។

យោងតាមសៀវភៅគោលនយោបាយជាតិ ស្តីពីការអប់រំ បណ្តុះបណ្តាលបច្ចេកទេសនិងវិជ្ជាជីវៈ ឆ្នាំ២០១៧- ២០២៥ បានបង្ហាញ ការអប់រំបណ្តុះបណ្តាលបច្ចេកទេសនិងវិជ្ជាជីវៈ (TVET) គឺជាកត្តាមិនអាចខ្វះបានក្នុងការអភិវឌ្ឍសេដ្ឋកិច្ចសង្គម និងជំរុញឳ្យអ្នកសិក្សាទទួលបានចំណេះដឹង ជំនាញបច្ចេកទេស ជាមួយសមត្ថភាពពិតប្រាកដ ដើម្បីក្លាយខ្លួនជាពលករជំនាញ អ្នកបច្ចេកទេស ព្រមទាំងចូលរួមចំណែកយ៉ាងសំខាន់ក្នុងការអភិវឌ្ឍសង្គម និងជំរុញកំណើនសេដ្ឋកិច្ចជាតិ  ដើម្បីប្រទេសកម្ពុជាឈាន ចេញពីចំណោមក្រុមប្រទេសក្រីក្រមកជាចំណាត់ថ្នាក់ “ប្រទេសមានចំណូលមធ្យមកម្រិតទាប” ហើយគោលដៅ សេដ្ឋកិច្ចសង្គមរបស់រាជរដ្ឋាភិបាល គឺធ្វើការប្រែក្លាយ ប្រទេសកម្ពុជាទៅជា “ប្រទេសមានចំណូលមធ្យមកម្រិត ខ្ពស់” នៅឆ្នាំ២០៣០ និងក្លាយជា “ប្រទេសអភិវឌ្ឍ” នៅឆ្នាំ២០៥០ ។

ទន្ទឹមនឹងនោះ សៀវភៅគោលនយោបាយជាតិ ស្តីពីការអប់រំ បណ្តុះបណ្តាលបច្ចេកទេសនិងវិជ្ជាជីវៈ បានបង្ហាញពីកត្តា ប្រឈមនៃការចុះឈ្មោះចូលរៀនជំនាញបច្ចេកទេសនៅមានកម្រិតទាប ដោយសារប្រជាជនមួយចំនួនឳ្យតម្លៃតែលើ ការអប់រំកម្រិតឧត្តមសិក្សា (សាកលវិទ្យាល័យ) គ្រឹះស្ថានសិក្សាភាគច្រើនមិនទាន់បានអនុវត្តយន្តការផ្តល់ការណែនាំឳ្យបានទូលំទូលាយដល់សិស្សឳ្យមានជម្រើសផ្សេងៗ រួមទាំងការផ្សព្វផ្សាយអំពីសារសំខាន់នៃការអប់រំបណ្តុះបណ្តាលបច្ចេកទេសវិជ្ជាជវៈ។ ម៉្យាងវិញទៀត ទស្សនៈ អវិជ្ជមានដែលមានលក្ខណៈទូទៅសម្រាប់បណ្តាប្រទេសមួយចំនួនក្នុងអាស៊ាន ត្រូវបានចាត់ទុកថាការអប់រំបណ្តុះបណ្តាលបច្ចេកទេស វិជ្ជាជីវៈ ជា “ជម្រើសទីពីរ” បន្ទាប់ពីថ្នាក់មហាវិទ្យាល័យ ឬសម្រាប់តែជនក្រីក្រ ជនងាយរងគ្រោះ និងជនបោះបង់ការសិក្សាពីប្រព័ន្ធអប់រំចំណេះទូទៅ។

ឧកញ៉ា បានក្រើនរំលឹកដល់យុវជនថា មិនថាយុវជនរៀននៅមហាវិទ្យាល័យ ឬគ្រឹះស្ថានបណ្តុះបណ្តាលបច្ចេកទេសវិជ្ជាជីវៈទេ យុវជនត្រូវផ្តោតជាសំខាន់ លើចំណេះជំនាញណាមួយឳ្យបានច្បាស់លាស់ ជាជាងរៀនចប់ទទួលបានតែសញ្ញាបត្រ ពីព្រោះសព្វថ្ងៃនេះ និយោជក និងស្ថាប័ននានាឳ្យ តម្លៃខ្ពស់លើចំណេះ ជំនាញ និងសមត្ថភាពពិតប្រាកដ ព្រមទាំងសមទ្ធផលការងារជាក់ស្តែងជាគោល៕